Zarorat ya Nasha?

Room mein sanata or andhera tha achank alarm clock ki awaz nay khamoshi tor di. Is awaz se usy shadid nafrat thi jab b wo ye awaz sunti to usy lagta kay us k kan path jaein ge. Us nay sona chaha magr ye awaz sone nahi de rhi thi isy bnd krne k liye us nay hath agey barhaya to clock niche gir gaya. Usy shadid gusa aya wo uth kar bethi to us k room ka darwaza khula. Uski ami andar ai or light on ki.

“Fasiha.....!” unho nay alarm clock niche se uthaya. “kya krti ho tum...! hr subah tum nay is maskin ko zaroor girana hota hai? Acha chalo uth jao abi tayar ho jao mein nashta banati hu.” Unho nay clock table pr rkha or bahir chali gayi.

Fasiha nay apne sarhane pari kitab ko dekha. Jo rat ko prha tha wo sab us k dimag mein aya.

“Yes...! sab yad hai mujey!” wo muskrai or bister se uth karhi hui.

Collage pohnchte hi uski dosto nay usy ghera. “Fasiha! Kesi tayari hai?”

“Tayari zabardast hai.”

“ufff! Meri to bilkul b nahi hai.” uski ik dost nay kaha.

“Itna mushkil to nahi tha yar. Prha nahi kya?” Fasiha nay pocha

“Nahi bs aik bar dekha tha.” Us nay class mein dahal hote hue kaha.

Jab sari lrkiya class mein aa chuki to teacher nay drwaza bnd kia or sab ko khamosh hone ka kaha. Fasiha sab lrkiyo k darmayan mein bethi hui thi or us kay piche us ki dost Nazish thi.

Teacher nay sab ko test diye. Fasiha thori nervous hui jab us ki teacher nay us k table pr aik paper rakha to us ka mu red ho gaya. Us nay exam pr dekha. Pehla sawal....dusra sawal.....tisra....nahi kuch b to nahi ata tha sab kuch dimag se nikal gaya.

Us nay pura paper dekha. “Fasi! Yad karo....!” us nay dil hi dil mein kaha. “Acha nam to likhu apna...phir ahista ahista yad krti hu.” us nay apna nam likha or ankhein band kr k dimag pr zor diya.

Nahi.....kuch b nahi yad aya usy. Wo thak kar idher udher dekhne lagi us kay baein tarf us ki dost Hafsa bethi thi jo jaldi jaldi likhe ja rhi thi. Fasiha nay us ki taraf dekha or uski nazrein uthne ka intazar karne lagi. Kafi dair ho gai magr Hafsa nay us ki tarf dekha hi nahi.

Phir us nay apne daein tarf dekha us ki dost Noor b us ki hi tarah bethi hui thi. Us nay nafi mein sr hilaya mgr Noor ko samj na ai phir us nay pencil uthai or hath pr likha “sab kuch bhool gaya hai” or Noor ko dikhaya. Noor nay dekhte hi apne hath pr likha “mene to kuch yad hi nahi kia tha...!” jab Noor Fasiha ko apna hath dikha rhi thi to teacher nay dekh lia.

“Noor or Fasiha! Test de dein.” Unho nay guse se kaha to wo dono mu latkae apna apna paper teacher kay table pr rakh ain.

Teacher nay un kay samne un dono kay test pr 0 laga dia. Fasiha ko bohat dukh hua. Wo ghar ai apna darwaza band kia, apna bag zameen pr phenka or beth kar rone lagi.

“kyu aisa hota hai mere sath....itna to parha tha.... rat ko b prhti rahi magr phir b....” garm garm ansuo se us kay gal bhig gaye us nay sir gutno par rkha or puth puth kar rone lagi.

“Is se to behtr hai k ainda parhu hi na....Noor nay kuch nahi prha to b uska 0 hi laga hai or mene itna kuch prh prh k mera b 0 hi laga hai. Or upar se biology ka tha or wo b pehli dafa teacher nay reham kha kr 1 chapter dia or mein....prhne k bawajood.....mere sath hi kyu aisa hota hai...?”

Rat ko roz wo apni dadi ama se mil kar soti thi magr aj jab se wo collage se wapis ai thi us wqt se hi khud ko room mein bnd kia hua tha. Raat kay 9 baje to us ki dadi nay darwaza khatkataya.

“koon hai...?” us nay apne takiye se sir uthate hue pocha.

“Fasi! Mein hu. Darwaza kholo.”

Us nay apni dadi ki awaz suni or dobara sir takiye par rakh lia.

“Kholo na....!” Unho nay phir se dastak di.

Ab usy pata chal gaya tha kay jab tak wo darwaza nahi khole gi us ki dadi nahi jaein gi. Wo uthi or darwaza khola.

“Areay beta ye kya hal banaya hua hai apne kamrey ka sab kuch ulta pulta kr k phenka hua hai.” unho nay Fasiha ki tarf dekha to us b bal bikhre hue the. Ankhein b thori si surh hui hui thi.

“Fasi...! kya hua...?” Unho nay usy bazuo say pakra to Fasiha un kay gale lag kar zar o katar rone lagi. “Areay Fasiha....meri bachi kya bat hai...? kya hua hai?” wo chonk gayin. “Acha idher ao...yaha betho.” wo dono bed pr bethin.

Ab Fasiha nay bhi ro dho lia tha ab wo halka mehsus kr rhi thi. “Ab batao kya hua hai?”

“Dado aj bio ka test tha. Mene kal rat 1 baje tak beth kr prha hai sab yad tha pr jab paper samne ata gaya hai to sab kuch bhool gaya hai. Dado pichle test mein b aisa hi hua tha. Ain time pr sab kuch bhool jata hai. Mein kya karu...?” wo thake hue lehje mein keh rhi thi.

“hmm....rat ko jab prh rhi thi to mobile pas hi tha?”

“Han pas hi tha.”

“kis kis ka massage aya?”

“Ansa thi...pr wo test kay bare mein hi poch rhi thi or Sania ka b aya tha pr us nay b test kay bare mein hi bat ki thi.”

“jab tum parh rahi thi us wqt?” Unho nay pocha.

“Ji dado...” us nay mu latkaye keh dia.

“acha or class mein teacher ko dihan se suna tha?”

“Han na dado. Noor hansane ki bht koshish krti thi pr mein phir b sanjidgi se teacher ko sunti rhi

hu.”

Unho nay sr hilaya jese sab kuch samj mein aa gaya ho.

“Agla test kab hai?”

“Agla..........” wo sochne lagi. “2 hafte pare hain abi. Phir dobara Bio ka hi hai.”

“Acha chalo ik kam krte hain. Kal se tum Noor kay sath nahi betho gi or jab prh rahi ho gi na to mobile mujey de dena krna hai phir dekhte hain kesa hota hai tumhara test or class mein teacher ko gor se sunana hai.”

“Kuch b nahi ho ga. 10^th mein itne ache marks ate the hala k itna parhti b nahi thi or ab FSc mein pehle se zyada prhti hu pr marks nahi atey. Sab kuch kr k dekh lia hai naqal b nahi kamyab hui, rata b nahi, tuka b nahi.” Wo mayoos thi.

“10^th mein tumhare pas mobile nhi tha. Or tumhari itni dostein b nahi thi tum thora parhti thi magr dihan se prhti thi tawaja deti thi magr ab book le kr bethi rehti ho or hath mein tumhare mobile hota hai. Dihan tumhara kitab mein nahi mobile mein hota hai is liye tumhein sab kuch waqti tor par yad hota hai phir sab kuch bhool jata hai. Fasi mein nahi kehti kay mobile use krna buri bat hai par beta aik time banao jab parh rahi ho to mobile band kr dia karo or collage mein to bilkul b use na kia karo. Sahi hai?” Unho nay pocha.

“thik hai. Kal say mein collage se ane kay 1h bad ap ko mobile de dia karu gi. Apka tareeka b azma lete hain.”

“Collage aik shart pr.....”

“Wo kya?” us nay herangi se pocha.

“sirf jate wqt on rkhna hai or ate wqt baqi time bnd rkhna hai?”

“ok dado.”

Ab us nay aisa hi kia. Agle din collage pohnchte hi us nay apni aik dost se apni jaga tabdeel kr li ab wo sab say agey bethati thi. Apni dosto se hansi mazak b wo sirf break time krti class mein wo sirf teachers ko sunti thi.

Ghar atey hi wo khana khati TV dekhne k sath sath wo thori dair mobile use krti or prhne beth jati. “Fasi...tumhein kya ho gaya hai achank. Bat hi nhi krti ho ab.” Uski dosto nay us se kaha.

“krti to hu dekho han abi b kr nhi rhi.” us nay hans kr keh dia.

2 hafte guzar gaye. Aj jab wo prh rhi thi to us kay dimag mein wo sab aa rha tha jo teacher se us nay suna tha. Achi tarah se yad kr lene k bad us nay dobara se sara dohraya or book band kr di. Is kay bad us nay namaz prhi ALLAH se dua ki or sakoon se so gai.

Subah us ki dado nay usy jagaya wo tayar ho kar collage pohnchi. Hamesha ki tarah aj b hone wale test k bare mein hi guftago ho rahi thi. Sab larkiyo nay hath mein kitabein pakri hui thi.

“kesi tayari hai Fasiha?” Nazish nay pocha.

“achi hai bs dua kro acha ho jaye.”

Aj teacher nay us k samne test rkha us nay sab se pehle Bismillah parhi or test pr dekha. “Pehla b ata hai, dusra bi, tisra b, waooooo chotha or panchawa b My God! Sab ata hai pr daswa ye kon sa hai? Acha khair pehle jo ate hain wo to karu.” us nay nervous hue bina sare sawal kiye pr daswa usy sahi tarh se nahi ata tha lekin jo usy ata tha wo us nay likh dia. Jab wo akhri lafz likh rahi thi to bell baji. Teacher nay sab se test le liye. Fasiha bht khush or pursakoon thi. Noor jaldi se us k pas ai.

“kesa gaya?”

“Acha ho gaya hai. Or tumhara? Areay aj kya likha hua ha hath pr?” us ki nazar Noor k hath pr pri.

Noor nay apna hath agey kia jis k upr likha hua tha. “kuch yad hi nahi kia to...”

Fasiha dekhte hi hans pari us ki khushi dugni ho gai jab usy wo din yad aya jab Noor nay usy ye likh kr dikhaya tha.

“aj kis se bat ki?”

“Nazish say....”

“teacher nay dekha nahi?”

“naa aj koi nahi dekha.” wo hansi.

Chuthi hui to Fasiha apne ghr gai. Uski dado usi ka intazar kr rhi thi. “kesa hua?” unho nay pocha. “acha ho gaya bs aik sawal nahi ata tha thora sa baqi sab thik kia.”

“chalo sahi hai. Kal batae gi number?”

“ji dado...”

Aj wo bht pursakoon or khush thi. Agle din wo collage gai, teacher nay test check kr liye hue the. Wo lrkiyo ko test de rhi thi koi bht zyada khush ho jati apna test dekh kr to kisi ka mu latak jata koi sharmindagi se hans deti. Fasiha be sabri say apne test kay milne ka intazar kr rhi thi. Sab se akhri test usi ka tha.

Us ki teacher nay us ka test us k hath mein dia to wo to jese hawao mein urne lagi. Us k 10 mein se 9,5 number the.

“mubarik ho...!” teacher nay muskra kr kaha. “naql to nahi ki?”

“nahi miss....!” wo muskrai.

“phir....?”

“bs mobile ka istamal kam kia hai...”

“very good.” unhein ye bat bht psnd ai.

Unho nay Fasiha ko apni jaga pr karhe hone ko kaha. “Fasiha kay sab se zyada number aye hain. Pehle sab se kam is k ate the ab zara is se waja pochte hain.”

“Waja ye hi hai k aj kal hum logo nay mobile ko apna sab kuch samj lia hai hr wqt dosto se batein krna...jis ki waja se hum kisi kam mein tawaja nahi de pate. Mene in 2 hafto mein mobile din mein sirf 1h k liye use kia hai or result b apkay samne hai. Mein to sab se ye hi kahu gi mobile, facebook, twitter ye sab istamal karein magr aik had mein reh kr. Isy zarorat kay mutabiq istamal karein nasha na banaein...!” us k chup hote hi sara class room taliyo se gunj utha.

                                                                                                                                         Umeed e Sehar

Khubsurati

                                                         Khubsurati

“Aj mein bht khush hu Harm(حرم )...!” Wo aine kay samne karhi thi. Harm b us kay piche karhi mobile pr apni dost ko msg kr rhi thi. Jab us nay Amna ki taraf dekha to muskrane lagi, us ki muskrahat mein tans bi tha.

“Itna make up krne k bad khushi hui hai to heran hu mein.... meri tarf dekho” Wo aine k samne hui. Aine mein us ka haseen chehra dikha. Aik aisa chehra jis ki khaish hr lrki krti hai. “Mein nay to koi make up b nahi lagaya or dekho mera husan, kya ab mein b tumhari tarah khushi se uchalne lagu?” wo hansi.

Amna ko us ki hansi bht buri lagi. Us nay aine mein us k sath apna chehra dekha to wo sach mein phiki si lag rhi thi. Amna or haram cznz thi kehne ko to Harm Amna ki dost b thi magr ehsas e kamtari mein mubtala hone ki wja se na aj tk Amna nay Haram ko apna dost mana tha or Haram to kisi ko apni dosti kay kabil hi nahi samjti thi.

Amna se jab us ki bato ka koi jawab na bn saka to wo us kay room se chali gai.

Harm boht khubsurat thi, hr jaga usy uski khusbsurti ki waja se izat di jati thi...hr koi us ki khubsurati ki waja se us se dosti ka khaish mand tha khubsurati to aik tarf us ki dolat or maa bap ki ikloti olad hone ki waja se to us ki or bi izat barhi hui thi.

Amna dil bardashta ho kar apne ghar pohnchi. Wo log Harm logo ki tarah itne ameer nahi the, wo ghar mein dahil hui to sehan mein chohte chohte bache apas mein khel rahe the.

Unhe dekh kr us ki udasi jhat se gayeb ho gai. “Sonu.....Ali.......!!! wo bacho ki taraf bhagti hui gai.” Us nay apne sare bhanje bhanjiyo ko gale se laga lia. “Aww! Aliya bhi ai hui hai....!” wo sab ko pyar kar rahi thi.

“Khala! Aj tum bht pyari lag rhi ho...” Sonu bola.

Amna kay zehan mein Harm ki tasveer ai. Usy u laga jese Sonu b us ka mazak ura raha hai.

“Sonu......!” us ka lehja buland hua or wo zameen se uth karhi hui.

“ Sharam nahi ati tumhein.... kitne batmiz ho gaye ho tum... han?”

Sonu seham gaya. Darwaze mein karhi us ki behan Asma usy dekh kr heran reh gayi. Sonu ko sir jhuake dekha to wo bahir sehan mein aa gayin.

“Amna! Kya hua?” unho nay dhire se pocha.

Amna kuch kahe bina apne room mein chali gayi.

Rat ko jab Asma kay bache so gaye to us nay Amna se bat krni chahi. Us waqt wo sehan mein bethi chand ki tarf dekhe ja rhi thi.

“Amna! Akele kyu bethi ho?” Asma us k pas bethi.

“Bs aese hi...” us nay nazrein jhukae keh dia.

“Amna! Meri tarf dekho...!” Asma nay us ki thori pr hath rkh kr us ka chehra upr uthaya. Amna apni behn ki ankho mein dekhte hi rone lag gai. Asma ko wo is wqt masoom bache ki tarah lagi us nay usy apne gale lagaya. Jab Amna nay khub ro dho lia to khud hi batane lagi.

“Baji! Allah nay mujey kyu itna khubsurat nhi banaya. Kuch b nahi dia mujhe, na dolat na khubsurati. Kya ho jata agr thora khubsurat mujey b bana deta to. Harm ki taraf dekha hai ap nay kabi....wo kitni khubsurat hai or kitni ameer bi. Hum log b to us ki hi cznz hain na mgr na hi us ki tarah ameer hain or na hi khubsurat. Ye zyadati nahi?”

Asma us ki sari bat sunane k bad muskra di. “Nahi...” Amna Asma k chehre ki taraf herangi se dekhne lagi.

“Tumhein kis nay kaha hai k tum khubsurat nahi ho?”

“Bs mujey pata hai na... Kash mein b itni khubsurat hoti k khud pr rashq kr skti. Khud se ishq kr skti. Apne ap ko dekh kr mujey sakoon hi mil skta hota.”

“Changi surat te ashiq hona kadi ae danai....Ashiq ban tu us sohne da jis ae shaqal banai....” Asma nay apne mithe or dhime lehje mein shair parha. Amna kay dil pr ja kr us k alfaz lagey.

“Amna mere bache khubsurat hone mein insan ko koi kamal nahi. Allah khubsurat banata hai na... or khubsurati or jawani kab tak rehti hai aik na aik din to insan budha ho hi jata hai...lekin agr insan apne ap ko andar se khubsurat bana le to wo hamesha khubsurat rehta hai... hamesha....or Amna! Jo apni ya dusro ki khubsurati dekh kr banae wale k ashiq bante hain wo hi faide mein rehte hain or wo khud ba khud khubsurat ban jate hain.”

Amna kafi din Asma ki baton kay bare mein sochti rahi. Us ki baton or lafzo mein itna dam tha k wo Amna ki zindagi badal sakein.

Collage mein bi ab Haram ko agr dekhti to ahsas e kamtari mein mubatala nahi hoti thi.

Aj Haram us kay pas ai. “Amna! Aj kal tum muj jitna khubsurat lagne k liye make up kyu nhi krti...?” Haram k sawal krte hi us ki dosto nay kehka lagaya.

“Zahiri husan mere bs ki bat nahi, magr mein apne batin ko apne andar kay insan ko khubsurat bana rhi hu mere liye ab apni ruh ka khubsurat hona maini rkhne laga hai apne jisam ka nahi...”

Us nay pur aitmadi se jawab dia. Haram ko herangi hui. “huh, my foot.” us nay Amna k jane kay bad kaha.

Haram ko Amna ki bat pr gusa aa rha tha wo guse se lal pili ho kr ghr pohcnhi. Wo ghar dahal hui to kuch mehman bethe hue the.

“Haram! Dekho tumhari anti or un ka beta aye hain America se...” Us ki mama nay khushi se kaha.

Haram nay unhein salam tk krna gawara na kia or apne room mein chali gai.

“Lgta hai bht thak gai hai aj...” uski mama nay muskrate hue keh dia.

Abas apni walida kay sath ghar pohncha to kafi uljan shikar tha. “Mom! Ye wo lrki thi, jis ki tareefo mein ap zameen asman aik kr deti thi?”

“Areay beta to kya kami hai us mein, tum nay aj tak us jesi khubsurat lrki dekhi hai?”

“Mom aesi khubsurati ka kya faida? Mein nahi karu ga us se shadi.”

Udher Haram ki mama us k room mein gayi.

“Haram! Ye koi tareeqa hai. Wo sirf tum se milne aye the. Tumhara intazar kr rahe the or tum nay un logo ko salam tk nahi kia.”

“To mein kya karu...? na karte mera intazar, mene kaha tha karein.” Us nay la parwahi se keh dia.

Aj Amna ghar ki safai kr rhi thi. Unho ne Tahira or Abas ko ghar bulaya tha. Asma bhi ai hui thi.

Jab sab kuch saf ho gaya to sham ko Abas or uski mama Amna logo kay ghar ayi. Amna logo nay un ka ache se istaqbal kia or khushi se mili.

Amna ki maa ko unhein bithane k liye jaga nahi mil rhi thi. Asma or uski mama mehmano kay pas bethi rahi jab kay Amina salam krne or izat se hal wagera pochne kay bad kitchen mein chali gayi.

Is kay bad us nay khana lagaya or sab ko bulane ai.

“Khana to bht mazey ka bana hai...!” Tahira Ilyas nay tareef ki. “Wah bai Amna tum to bht acha khana banati ho.”

“Shukriya anti.” Amna nay muskra kr shukria ada kia.

Abas or Tahira Ilyas dono hi bht khushi khushi Amna logo kay ghar se lotey.

Abas aj kal idher udher ghomney kay ilawa kuch nhi kr rha tha. Aj rat wo ghr aya to us ki mama en us se bat krni chahi.

“Abas! To phir kya khayal hai. Ab is bar to tumhari shadi kr k hi jau gi. Haram bht achi lrki hai...!”

“Kyaa...?Ap abi bhi Haram ki tareef kr rhi hain?”

“Agr wo meri bahu bane ki to dunya dekhti reh jaye gi. Han thori magroor hai ab koi itna khubsurat ho to itna garoor to phir us ka haq banta hai na...!”

“Muje wo bilkul b achi nahi lagi, agr ap ko meri shadi krni hai to Amna se kr dein, mujey koi aitraz nhi or wo Haram se behtar hai.”

“Tumhara dimag to kharab nahi ho gaya...? Amna or Haram mein zameen Asman ka farq hai.”

Unhein gusa aya.

“Wo b to ap k bhai ki hi beti hai.”

“Pr Haram jitni khubsurat nahi...”

“Mom! Ap ko Haram ki khubsurati ki wja se us ki batmizi b bhol gai or Amna ki mamoli shaql ki waja se us ki hamare liye itni izat b yad na rahi? Mein agr shadi kru ga to Amna se, Haram ka khial to zehan se nikal dijie ap.”

Majboran Tahira Ilyas Abas or Amna ki shadi k liye razi ho gayin. Unho nay Amna kay parents se bat ki to unho nay foran han kr di.

Haram ko jab us ki mama nay Amna or Abas ki mangani kay bare mein bataya to wo ag bagola ho gai.

“What? Amna or Abas.......my God....! wo kahi se b us k sath nahi match krti nahi Abas itna pagal b to nahi or us ki itni himat kay wo mujey........ mujey thukra kr us do takey ki Amna se.........nahi.....ye namumkin hai...or anti ki to hamesha khaish thi k mein un ki bahu banu...?”

“Kyu mumkin nahi ye..... un dono ki shadi ho rhi hai.”

“Dekh leti hu mein....Kese hoti hai un dono ki shadi...”

Wo subah collage se nikali to samne Abas karha tha. Haram ko to tha hi us ka intazar. Aj Amina collage ai hi nahi thi usy laga jese wo us se hi milne aya hai. Wo us kay pas gai.

“Tum yaha kya kar rahe ho? Agr tumhein ye lagta hai k mein ab tumhare sath ghumne chalu gi to galt lagta hai... tum to ho hi andhe tumhein hire or miti mein farq b nhi krna ata?”

“Andhi to tum ho gai hui ho apne nafs ki chah mein...... tum kya samjti ho k tum bht khubsurat ho? Areay apne zahir ko dekhne ki bajae apne batin ko dekho, kabi apne andar jhanko tumhein pata chale k tum kitni bad surat ho. Zahiri khubsurati kuch nahi hoti agr insan andar se khubsurat na ho or rahi bat Amna ki to wo aik naik shareef or tum se kai zyada khubsurat hai kyu k us ka dil saf hai wo dusro k liye bura nahi sochti or garoor nahi krti. Agr tumhein lgta hai k tumhari khubsurati sab kuch hai to aj khud ko galt sabit kr skti ho aj mein nay tumhein chor kr Amna ko select kr lia hai...”

Wo gari mein betha, us nay gari chalai to gard Haram kay kapro pr par gai.

Ghar jate hi wo aine k samne khari hui apna khubsurat chehra dekha lekin aj usy apne khubsurat chehre pr us ki hr buri adat kala dhaba bn kr nazar aa rhi thi.

Us nay piche ki taraf qadm barhane shiru kr diey... wo bed pr bethi, apna sir gutno pr rkh kr zor zor se rone lagi...

Asma aj bht khush thi wo Amna ko tayar kr rhi thi. “Jaldi karo bhi barat aa gai hai...!” Un ki ami kamrey mein ai or Amna ko dekh kr unki ankhein bhr ai. Wo us k pas gayi.

“MASHALLAH! Kitni khubsurat lg rhi ho!”

“Acha na ama...! ab bahir le kr chalte hain Amna ko...!”

Amna Abas kay sath stage pr bethi hui thi. Dono hi bht khush the lekin un ki khushi or b barh gai jab Haram hatho mein phool liye hall mein ai. Amna usy dekh kr bht khuhs hui.

“Mubarik ho...!” us nay muskra kr Amna ko phool dete hue kaha. “Amna tum bht khubsurat ho, bht achi ho....mene tumhara bht dil dukhaya mujer maf kr do. Mein jan gai hu k haqiqi husan insan kay andar ka husan hota hai zahiri husan mein insan ka apna koi kamal nahi balke ye to khuda ki dain hai. Khuda tum dono ko hamesha khush rakhe...!”

Haram ki bat sun kr Amna ki ankhein nam ho gayi or us nay Haram ko gale se laga lia.

AZ

Umeed E Sehar

UMEED E SAHAR KI BAT SUNO. . .!

                                            UMEED E SAHAR KI BAT SUNO. . .!

Uzair sofe par betha tv dekh raha tha remort us ke hath mein tha wo bar bar channel badal raha tha itne mein Mahnoor dono hatho mein ik ik chae ka cup liye kitchen se bahir ai.

“ye lijie apni garmo garam chae...!” us nay aik cup uzair ki tarf barhaya.

“shukriya...” uzair nay remort table par rakha or cup pakrte hue muskra kar uska shukriya ada kia.

Wo bi muskrate hue uzair kay sath sofey pr beth gai thori dair kay liye wo dono tv pr nazrein jamae chae pitey rahe.

“Mahnoor! Phir kya socha tum nay?”

“Kis barey mein?” wo jan booj kar anjan ban gai.

“Tum achi tarah se janti ho mein kis barey mein bat kar raha hu...”

“Uzair mein apko bata chuki hu kat mein Pakistan nahi chor sakti.”

“Kyu nahi chor sakti? Yaha rakha hi kya hai?” uska lehja thora buland hua. “6 mahine ho gae hain hamari shadi ko mein tumhein samja samja kr thak gaya hu tum ho kay meri bat samjti hi nahi.”

“Uzair...! jo yaha rakha hai wo kahi or nahi rakha.” us nay cup table pr rakhne kay bad pur sakoon lehje mein jawab dia.

“HUH! Ajeeb larki ho tum, ye mulak jaha koi ye yaqeen se nahi keh sakta ke wo rat ko ghar zinda lotey ga b ya nahi tumhein ye mulak pasand hai?”

“han Uzair mujey yehi mulak pasand hai.” us nay pur aitmadi se jawab dia. “janana chahte hain kyu?”

Uski khamoshi mahnoor ko jawab de chuki thi. Wo uthi or study room mein chali gai. Waha us nay aik purani si diary utha li. Aj us en kafi salo bad apni diary hath mein pakri thi. Aik pal kay liye to wo yu diary dekh rahi thi jese uski koi khoi hui chiz mil gai ho.

Wo apni diary liey bahir ai. Uzair usi tarah sofe par betha hua tha.

“Uzair aj 13 august hai. Ye lein phir subha mujey apna akhri faisla suna dein.” Us nay diary Uzair kay hath mein thamatey hue kaha.

“ye kya hai...? Or kaisa faisla?” us nay diary pakrte hue kaha.

“Ap khud dekh lijie ga.” Mahnoor jawab de kar waha se chali gai.

Uzair rat ko jab ghar aya to Mahnoor so chuki thi wo study room mein gaya or kursi pr aram se beth gaya.

Us nay Mahnoor ki diary kholi.

“Mera nam Mahnoor hai...Mahnoor Fatima...!

Mein us waqt 10^th class ki student thi. Mere walid aik sabzi farosh the or unka sapna tha kay mein CSS karu.

Mene suna tha kay jeet hosle ki hoti hai par jis mulak mein hum rehte hain waha jeet sirf paise ki hoti hai.

Mein achi tarah se janti thi kay mere aba collage kay kharche kabi nahi utha sakein ge or mein matric se agey talim nahi khasil kar pau gi is liye meine mehnat karni chor di thi or 9^th class mein mere marks kuch zyada ache bi nahi aye the.

August ka mahina shiru hone kay sath sath school bi khul gae. Or sath sath 14^th august manane ki tayaria bi shiru ho gain.

Mein bi larkio kay sath mil kar 14^th august ko mili nagme parh dia karti thi par us din class khatm hui to meri urdu ki teacher madam Zoha sahiba nay mujey roka.

“Mahnoor! Tum taqrir karo 14^th august ko.”

“Mein...? mein kya taqrir karu gi madam...?” mujey unki bat mazak lagi.

“Tum bohat acha likhti ho Mahnoor! Class mein tumhare likhe gae mazmoon baqi sab se alag hotey hain. Agr tum taqrir karo gi to mujey bohat khushi ho gi.”

“Thik hai madam par koi topic to bataein?”

“Phir mein likh bi khud hi na du...? tum bohat acha likh sakti ho isi liye mene kaha hai...socho thora sa...!”

Mene us waqat han to kar di thi par mujey samj nahi aa raha tha kay kya likhu...

Rahi bat mere mazamin kay ache hone ki to wo mein bi manti thi kay muj jesa dimag chand hi logo kay pas hota hai or agr ye dimag kisi ameer kay pass hota to shayed wo aj asman ki bulandio ko choh raha hota.

Khair 12^th august ko mein school gai to madam Zoha nay mujey staff room mein bulaya wo waha akeli hi thi.

“Mahnoor! Tum nay taqrir likh li?” unho nay pocha.

“Han madam likh li hai.” mene jhoot bol dia.

“Sunao to sahi...!”

“Wo to ap 14^th august ko hi sunye ga.” meine muskara kr kaha.

“Ok thik hai, mein janti hu bohat zabardast ho gi.”

Mein us din sham ko sirio par apni copy or pen liye bethi. Mene hath mein qalm pakra or likhne kay liye copy par rakha hi to ama ki awaz ai. “Noori...! bartan dhone wale parey hain utho zara wo dho do.”

Mene wahi likhna chora or bartan dhone chali gai.

Agle din mein school se wapis ai to hazar kam mera intazar kar rahe they. Rat hone tak mein ghar kay kam kaj karti rahi. Phir mein itna thak gai kay bistar par dhair hona chaha.

Mein apne kamrey mein gai or charpai par gir pari. Meri nazrein chath ko tak rahi thi achanak mere dimag mein khial aya kay kal to 14^th august hai...! or meine abi tak koi takrir nahi likhi...!

Mein uthi or wo hi kagaz jis par mein kal likhne lagi thi uthaya. Taqrir likh kar aik bar parh li or sarane ke niche rakh kar so gai.

Subha mein uthi! Safeed uniform pr aj safeed dubate ki bajae sabaz dubata lia or school chali gai.

Mere janey tak takreeb shiru ho chuki thi.

“Mahnoor! Itni dair laga di. Khair abi bs tumhara nam ane hi wala hai apni seat par beth jao.”

Madam Zoha mera hi intazar kar rahi thi. Mein apni seat pr aram se bethe larkio ki taqareer sun rahi thi takriban sari larkiya Pakistan ko khasil karne kay liye qurbania dene walo ko hiraj e tehseen paish kar rahi thi.

Phir mera nam pukara gaya. Mein purey aitmad kay sath stage par gai.

“Bismillah ar Rahman ar Raheem

Hazreen e mehfil ASSLAM O ALIKUM

Abi meri chand dostoon nay Pakistan khasil karne kay liye qurbania dene walo ko hiraj e tehseen paish kia. Yaqinan wo tamam log bohat azeem hain or Khuda ka shukar hai kay hamein mazi mein hi sahi aise log to miley.

Unho nay hamein azadi dilai par mera sawal ye hai kay kya hum nay azadi barqrar rakhi hai? Ji nahi...! Aj jisey hum Pakistan kehte hain wo gareeb kay liye dozakh or ameer kay liye janat ban gaya hai.

Gareeb ki olad ko chahe khuda nay jitni hi silaitein kyu na di houn wo nakam hi hota hai or ameer ki olad chahe aqal se paidal ho kamyabi hi uska muqadar banti hai.

Aj yaha dehasht gard masoom bachioo kay school tabah kar rahe hain, masajid mein bomb phenkein ja rahe hain or khoon bi beh raha hai to gareeb admi ka.

Or ameer zade jo na khud halaat thik karte hain na gareebo ko mauqa dete hain kay wo halaat ache kar sakein...

Halaat ki sangini aik taraf hum to apni pehchan hi kho rahe hain. Hamarey han english bolne wala aik motbar or aqalmand insan samja jata hai jab kay urdu bolne wala aik anparh. Kameez shalwar pehnane wala aik jahil jabkay jeans pahnane wala aik modern or acha shahri samja jata hai. Hum dosre mamalik ko yu copy kar rahe hain jaise hamari apni koi zuban koi libas hi na ho...

Taraqi do nazriat ki bina par milti hai AZADI or BARABRI ye dono chizein hum kho chuke hain or agr hum inhein dubara hasil kar lein to koi mojiza hi ho ga...

Bahar hal ye meri soch hai is se aitfaq karna ya na karna apka haq hai...

Bohat shukria.”

Mene apni taqrir khatm ki kisi nay tali na bajai. Kisi kay wahm o guman mein bi nahi tha kay mein aesi taqreer karu gi.

Bad mein achi taqreer karne wali larkiyo ko inamat se nawaza gaya mujey koi inam na dia gaya. Lekin mujey apne kie par koi sharmindagi mehsos na hui.

Taqreeb kay ahtatam par madam Zoha sahiba mere pas ain.

“Mahnoor aisi taqreer likhi thi tum nay? Aesi soch hai tumhari? Khud to tum na umeed ho lekin na umeedi phelao to nahi...!”

“Huh...!” mein tamasharana andaz mein muskarai. “Umeed or wo bi is mulak mein reh kar...? Madam merey liye umeed ka lafz napaid ho chuka hai. Mein mayus na houn to kya karu? Itni zahanat hone kay bawajood mujey koi faida nahi...mere walid kay pas meri ala taleem kay liye sirf sapne hain or is mulak mein sapne or himat nahi balke paise ki jeet hoti hai...isi liye mene to mehnat karni hi chor di hai isi liye mere 9^th mein marks bi ache nahi ae. Agr ache bi aa jaein to mein konsa agey parh pau gi...Or rahi bat taqreer ki to mene apni soch sab kay samne bayan ki hai...!” Mein sanjida thi.

“Mahnoor! Tum nay parhai pr tawaja deni chor di hai to mein tumhein bata du ye koi aqalmandi ki bat nahi.” unho nay aitmnan say meri bat sunanae kay bad kaha. “Or tum is sarzameen par basne walo kay barey mein kya keh rahi thi? Areay yaha kay log to aise muhabat karne or khial rakhne wale hain kay agr aik hamwatan takleef mein ho to dard sari qoum ko hota hai or Mahnoor khuda us qoum ki halat kabi nahi badalta jo khud apni halat na badlna chahe. Mahnoor! Khuda nay tumhein jitni zahanat se nawaza hai agr tum is ka istamal karte hue sanjidgi se parhai karo to agle 14^th august pr mein tumhari taqreer sunana chahu gi.”

“Thik hai dekh lete hain kya ho jata hai mere mehnat karne se...!”

Us din kay bad mene sanjidagi se parhna shiru kar dia. Class mein dihan deti or homework bi bakaidgi se karti sath sath mein ghar kay kam bi karti thi.

Madam Zoha mujey is tarah mehnat karta dekh kar bohat khush thi. Mene aba se wada kia tha kay 10^th mein zabardast marks lu gi agey collage mein parhna ya na parh sakna kismat pr chor dete hain. Aba bi khush ho gaye warna meri mayusi unhe b udas kar deti. Bahar hal ama kay siwa sab muj se bohat khush the.

Aik din mein ghar ka kam kar kar kay bohat thak gai. Sham ko parhte parhte meri ankh lag gai. Mein kitab muu par rakhe soi pari thi kay ama ki awaz meri samat se takrai.

“Noori! Noori! Utho...” wo khawas bakhta thi.

“kya hua ama?” mein uth kar beth gai.

“Tumhare aba abi tak ghar nahi aye, chalo mere sath unhe dhundane chalein.”

Aba nay ghar aney mein itni dair kabi nahi lagai thi. Mene dubata sar par lia or amma kay sath chal pari.

Galiyo mein bohat rash tha. “Beta! Kya hua hai?” Amma nay gali mein karhe ik larke se pocha.

“Pata nahi mujey bi nahi pata.” us nay hamein jawab dia.

Phir hum us jaga gain jaha aba reri lagate the. Ambulances ka shor tha or logo ka hajoom. Aurtein chihein mar mar kar ro rahi thi...

Mein sari surat e hal dekh kar gabrha gai door door tak aba dikhai nahi de rahe the. Phir mujey aik jana pehchana chehra nazar aya. Mein un kay pas gai.

“Jamal bhai! Kya hua hai?” Jamal bhai hamre parosi they.

“Khud kush damaka ho gaya hai...” unho nay zor se bataya itna shor tha kay kaan path rahe they...unki bat sun kar mere rongte karhe ho gaye.

Unho nay amma ki taraf dekha jo muj se thora piche idher udhar aba ko dhoond rahi thi to wo un kay pas gaye.

“Khala! Ap Noori kay sath ghar jaein mein chacha ko lay kar ata hu.”

“Noori kay aba kaha hain?” ama ki nazrein ab bi aba ko dhoond rahi thi.

“Idher hi kahi houn ge. Ap jaein...Noori! Le jao inhe.”

Mene ama ka bazu pakra or ghar ki taraf kadam barhane lagi amma or mein dono abi bi mur mur kar piche dekh rahi thi.

Ghar pohnch kar mene ama ko pani pilaya or hosla dia hala kay mein andar se khud bohat dar gai hui thi. Phir ama thori sambhali to mein sirio par beth gai or ama charpai par bethe aba ka intzar karne lagi.

Kafi dair bad darwaze par dastak hui.

“Amma! Aba aa gaye..!” mene khushi se ama ko kaha or darwaza kholne chali gai.

Mene darwaza khola to samne Jamal bhai karhe the. “Bhai! Aba nahi aye...” mera chehra utar gaya.

Is se pehle kay Jamal bhai kuch kehte chand muhale kay larke aba ki mayat kandho pr rakhe ghar mein dahal hue...

Mein darwaze par hi gir pari. Yu laga jese mere sar se kisi nay chadar cheen li ho...

Ama yu chikh rahi thi jese bijli kark rahi ho...

Agle din madam Zoha afsoos kay liye mere ghar ai. Un ki mulaqat amma se bi hui unho nay hum dono ko hosla dia... Parhai kay barey mein koi bat na ki.

Kuch din taziat kay liye log ate rahe phir sab apne apne kamo mein masroof ho gaye. Mene school jana chor dia tha.

Amma nay aba kay hotey hue jo paise bacha bacha kar rakhe they unhi se ghar chal raha tha. Rukhi sukhi kha kar hum dono maa beti guzara kar hi leti thi.

Phir kuch dino bad madam Zoha dubara mere ghar ai tab amma bazar mein sabzi lene gai hui thi.

Pehle to wo aba ke liye afsoos hi karti rahi phir unho nay mujey bataya kay kuch dino mein imtahanat shiru ho rahe hain.

“To kya? Mene kon sa paper dene hain?”

“Kya matlab? Tum aisa nahi kar sakti Mahnoor...! tum apne purey sal ki mehnat or apne aba kay sapne zaya nahi kr sakti...!”

“Mein ama ka dil bi nahi tor sakti. Wo nahi chahti kay mein parhai karu or wese bi mein apni jama pungi apni taleem par nahi kharach kar sakti. Or sach kahu to muj mein himat nahi rahi...” Mene unki taraf gor se dekha. “Madam mein apki bohat izat karti hu apki bat talna mujey pasand nahi please mujey dobara paper dene kay liye na kahie ga.”

“Thik hai Mahnoor lekin meri ik bat yad rakhna raat chahe jitni lambi or andheri kyu na ho subha zaroor hoti hai.” Unho nay apna bag uthaya. “Masaeb se nahi gabratey Mahnoor! Kyu kay sitarey hamesha andhere mein hi chamaktey hain... Meri bat par gor zaroor karna.” Wo yeh keh kar chali gain.

Do teen din guzar gaye mene madam ki bato kay bare mein kuch na socha agr mera dihan unki taraf jata bi to mein khud ko kisi kam mein masroof kar leti.

Ab ama kay pas thore say paise hi bach gaye they, wo kafi pareshan rehti thi na hi to hamara kamane wala aba kay bad koi tha hum paise kaha se la sakti thi...?

Mein raat ko apne kamre mein gai to khirki khuli thi mein khirki kay pas gai or take laga kar chodwin kay chand ko dekhne lagi jo puri abo o tab kay sath noor barsa raha tha asaman sitaro ki chada orey hue tha. Mera dimag har soch har khial se azad tha mein bas asman ki taraf dekhe ja rahi thi kay achanak madam Zoha ka chehra mere dimag mein ubra...

“Masaeb say gabratey nahi kyu kay sitare hamesha andhere mein hi chamkatey hain.”

“Mahnoor! Tum nay parhai par tawaja chor di hai to koi aqalmandi nahi ki. Khuda us ki halat nahi badalta jo khud apni halat na badalna chahe.”

“Mein agley 14^th august par tumhari taqreer sunana chahu gi.”

“Meri bat par gor zaroor karna.”

“Khuda us ki halat nahi badalta jo khud apni halat na badalna chahe.”

“UFFF...!!!” ab mujey unki batein tang karne lagi thi. Mein khirki se hati or almari se take laga kar bath gai. “Ama kay pas to thore se hi paise bache hain. Agr mein 10^th kay paper de lu to kam az kam mahale kay chohte bacho ko un kay ghar ja kar parhane kay kabil to ho jau gi warna log to kahein ge kay khud to matric tak nahi kia or hamare bacho ko parhane ai hai. Han! Pass to mein ho hi jau gi itna to mein janti hu...pura sal mehnat ki hai. ALLAH kisi kay sath na insafi nahi karta to phir mere sath kyu kare ga...mujey himat kar kay paper dene houn ge. Han! Mein zaroor du gi paper...zaroor!” Mene us andheri rat mein UMEED E SAHAR ki bat sun li thi.

Mein agli subha school gai. Madam Zoha ko mujer dekh kar herangi to nahi han khushi zaroor hui thi.

“Mujey pata tha tum aao gi...!”

“Madam mujey mera roll number or date sheet de dein. Baqi tayari mein ghar beth kar hi kar lu gi.”

“Kar lo gi...?” unka ishara ama ki taraf tha.

“INSHALLAH...!”

“Mahnoor! Tumhein is tarah bat karte hue dekh kar mujey bohat khushi ho rahi hai. Ye hui na asal Mahnoor!” wo muskrain.

Mein ghar wapis gai to amma mera hi intazar kar rahi thi. “School gai thi na tum?”

“Nahi...kam dhondane gai thi mein.” Mene jhoot bol dia.

“Kya kam?”

“Wo meri aik saheli hai na wo bohat ameer hai uskay chohte behan bhaio ko parhane jaya karu gi un kay ghar.”

“Tanhua kitni miley gi?” ama nay jhat se pocha.

“2 hazar...”

Unho nay sunte hi mujer galey se laga lia. Meri ankho se ansoo nikal ae.

Imtahanat shiru ho gaye. Mene barpoor mehnat shiru kar di. Har waqt parhti rehti thi ama muj se pochti thi kay mein kya parhti hu?

“Bacho ko parhana hota hai na, wo tayari karti hu.” Mein jhoot bol deti or ama kay nazro se ojal hone kay bad ro parti.

Mere paper bohat ache ho rahe the . Akhri paper tha to mein soch mein par gai kay aj kay amma se kya kahu gi. Ye soch kar hi mera hal behal ho raha tha.

Mein ghar pohnchi to ama nay mera latka hua mu dekh kar muj se pocha. “kya hua hai?”

“Ama wo un logo en mujey kam se nikal dia hai...” mene ama say akhri jhoot bola.

Ama chup ho gain koi sawal jawab na kia.

“Amma! Mein or koi kam dhoond lu gi. Wo Aasia bibi hain na jin ka itna bara ghar hai...Jamal bhai bata rahe they kay unhe aik nokrani ki zarorat hai. Mein un kay bartan manj lu gi par amma mein paise zaroor lau gi...”

“Nahi! Mein kam kar lu gi tumhari jaga...”

“Nahi ama...apki sehat or umar is bat ki ijazat nahi deti...mein khud karu gi kam.”

Agley din mein Aasia bibi kay ghar gai. Unho nay mujey kam par rakh lia. Mujey bi koi aitraz na tha wo pura din akeli hi hoti thi unki aik hi beti thi jo mulak se bahir parhne kay liye gai hui thi or rat ko merey ghar wapis aa jane kay bad un kay shohar office say atey or subha mere jane se pehle hi wo office chale jaya karte the.

Mein ghar ai or amma ko bataya kay mujer 3 hazar pr unho en kam par rakh lia hay to ama ki khushi ka thikana nahi tha. Ama ko khush dekh kar mera dil mutmain hua mujey bohat sakoon mila. Mene kabi socha bi nahi tha kay aik nokrani ki hesiat se kam karne par mere dil ko itni taskeen pohnch sakti hai par ama ki khushi mein meri khushi thi...

Aik martaba mein kam se wapis ai to amma merey aney tak so chuki thi. Mujey bohat bhook lag rahi thi mein kitchen mein gai to khali bartan parey they. Lihaza mein bhooki pyasi so gai.

Subha uthi to amma nay bataya kay kal dupehar se ghar mein khane kay liye kuch bi nahi hai.

“Amma ap fikar na karo mein Aasia bibi say kahu gi kay meri tanhua aj hi mujey de dein phir poorey mahiney ka rashan kharid lein ge or amma ap naya jora bi le lena. Mein bas abi jati hu un se paise lay kar nashtey k liye chizein ley ati hu.”

Ama ko itni bhook lagi hui thi kay un say bat tak nahi ho pa rahi thi. Mein bhooki payasi Aasia bibi kay ghar gai subha kay bartan dhoe phir mene un se bat ki.

“Bibi ji agar ap mujey mahine ki tanhua abi de dein to bari meharbani ho gi. Merey ghar mein khaney ko kuch b nahi bacha sara saman khatm ho gaya hai amma kal se bhooki hain.”

“Ok, jatey hue le jana.” Unho nay meri bat par tawaja diey bagair kaha.

“Bibi ji please abi de dein meri amma bhooki hain.” Mene minat ki.

Wo kuch dair to mere chehre ki taraf takti rahi phir apney kamrey mein gai or 3 hazar rupee la kar mere hath mein thama diey.

“Sath mein nashta bi le jao.” wo muskrain.

Meri khushi ka thikana nahi tha mene unka bohat shukria ada ki or dil hi dil mein hazaro duaein di.

Mein ghar aa rahi thi to rastey mein paratho wali dukan pr meri nazar pari. Amma ko aloo kay parathe bohat pasand they mene 2 parathe lay liye.

“Aj ama khush ho jaein gi.” ye hi sochte hue mein ghar ki janab qadam barha rahi thi.

“Amma dekho mein kya kya lai hu...!” mein khushi say ghar mein dahal hui.

“Amma! Amma!” mujey amma sehan mein nazar na ai to mein awaz detey hue amma kay kamrey mein dahal hui. “Amma......!!!!!!” mere mu se chikh nikali.

Mere ujrey hue baag mein bacha ik akhri phool bi murja chuka tha....meri amma mar chuki thii... mene amma ko girey pare dekha to mere hatho se parathey paisey sab gir gaye...

Meri chikho siskiyo mein log meri amma ko muj se door lay gaye or mati taley dafan kar aye. Muhaley kay log kafi din atey jatey rahey phir sab dunya dar dunya dari mein lag gaye.

Main bilkul akeli ho gai thi bilkul akeli...Khuda ki itni bari zameen par mera koi nahi tha...

Jab pait ki bhok barhane lagi to mene dobara Aasia bibi ka darwaza kathkataya. Unho nay amma kay kay liye muj se afsoos kia or kuch kahe bina mujey dobara kam par rakh lia.

Din guzartey ja rahe they...mein ghar ati to sunsan ghar dekh kr meri ankhein nam ho jati. Aisey lagta tha jese khuda nay ab mere muqadar mein ansoo hi baqi bachaey hain. Mene hasna bolna bilkul chor dia tha.

Poora din bibi Aasia kay ghar kay kam karti or rat ko rotey rotey so jaya karti.

Aik din main table saaf kar rahi thi or Aasia bibi sofe par bethi akhbar parh rahi thi.

“Mahnoor! Tumhein pata hai 10^th mein jis nay poore sube mein pehli position li hai na us ka nam bi Mahnoor hai. Barey zabardast marks liye hain!”

Mene unki bat an suni kar di. Mein paper school sab bhula chuki hui thi.

Itney mein tv par bi khabar chalne lagi. News anchor bi yehi khabar parh rahi thi. Aasia bibi nay akhbar table par rakha or tv dekhne lagi. Mene pehle to akhbar ki taraf na dekha pr phir meri nazar khud akhbar pe par gai.

Wo roll number mera hi tha...! Han wo Mahnoor Fatima mein hi thi!

Apna nam top par dekh kar mujey ama aba bohat yad aye. Meri khushio mein shareek hone wala koi na tha...

Mein apne jazbat par kaboo na rakh saki or zar o qatar rona shiru kar dia. “Areay Mahnoor kya hua hai?”

Aasia bibi nay muj se pocha. Muj se bat karni mushkil ho rahi thi. Bola hi nahi ja raha tha. “Mahnoor batao naa!” unho nay mere kandhe par hath rakha.

“Ye Mahnoor mein hi hu. Ye mera roll number hai.” Mene himat kar kay bataya.

“Kya...? Sach...!” Yaqeen karna un kay liye bohat mushkil ho raha tha.

Phir ye bat jungle mein aag ki tarah phel gai. Media walay muj par toot parey.

Mere samney itney sare sahafi mike pakrey karhe they, itney cameras thay pr mein nam ankhein liye sab kay samney chup kar kay khari thi. Bad mein unho nay bibi Zoha say bat ki to unhe mere dukho kay barey mein pata chala.

Miss Zoha, muhaley waley, bibi Aasia, media walay, saab mere gun ga rahe they magar mein murjaya hua chehra liye kisi say koi bat na karti thi.

Phir kuch din bad aik channel walo nay mujey interview kay liye bulaya. Muj say pocha gaya kay mein apne aba kay katilo ko kuch kehna chahti hu?

“Mene unki jan baksh di khuda kay liye wo dusro ki janein baksh dein.”

Muje hamdardi ki kai calls ati rahi mene khul kay kisi say bat nahi ki thi bs “hun, han” mein jawab deti rahi.

Akhir par muj se pocha gaya kay mein agey kya karna chahti hu. “Mein CSS karna chahti hu. Mere aba ki khaish thi.”

Hakomat nay meri parhai ka kharcha uthaney ki zimadari le li or mujey inam kay tor par kafi paisey diey gae. Naya ghar dene ka bi kaha gaya par mene mana kar dia.

Mein jaha se guzarti log ruk ruk kay mujey dekhte, meri tarifein kartey. Magar mere andar ki dunya bilkul udas ho gai hui thi. Par is bat par khushi hoti kay aba ki rooh pursakoon ho gi.

Agla 14^th august aaya to miss Zoha nay mujer school taqrer kay liye bulaya. Main purey time par pohanch gai.

Mera nam liya gaya to mein stage par gai.

“Bismillah ar Rahman ar Raheem.

Samein Asslam o alikum!

Pichlay saal isi din isi jaga karhe ho kar mene kaha tha ka aik gareeb ki is mulaq mein koi izat nahi or gareeb kuch nahi kar sakta chahe us kay pas jitni hi khuda dad salaitein kyu na houn pr meri soch galat sabit ho gai. Mein Mahnoor Fatima aik nokrani purey sube ki toper hu...!”

Logo nay talian bajani shiru kar di mein khamsoh hui.

“Mene apni halat badlna chahi to khuda nay meri halat badal di. Main apni qoum ko behis samjti thi par aisa bilkul bi nahi hamari qoum mein madam Zoha jaise log bi shamil hain jo muj jese mayus logo ko hosla dete hain or ye ehsas dilatey hain kay na umeedi kufar hai. Hamari qoum behis nahi hum apney halat badlna chahte hain or wo din door nahi jab Pakistan aman ka gehwara ban jaye ga. Iqbal nay kaha tha

NAHI HAI NA UMEED IQBAL APNI KASHT E WIRAA SAY

ZARA NUM HO TO YE MATTI BARI ZARKHEZ HAI SAQI

Bohat shukriya.”

Mene apni taqreer khatam ki or stage say niche utari. Logo nay talian baja baja kar apney hath laal kar liye.

Ye meri kahani thi. Mein samjti thi kay Pakistan mein reh kar mein apna ap kabi nahi manwa saku gi par mein galat sabit hui. Aj mujey kon nahi janta sab mere gun gatey hain. Agey mein CSS karu gi apney aba ka khawab pura karu gi or kabi umeed ka daman hath say nahi choru gi kyu kay na umeedi kufar hai.”

Uzair nay Mahnoor ki diary band ki. Uski ankhein num ho gain.

Wo subha hone tak study room main hi thori dair kay liye so gaya. Jab wo utha to Mahnoor kai salo ki adat ko barqarar rakhte hue aj bi 14^th august yateem khane mein yateem bacho kay sath manane kay liye tayar ho rahi thi.

Jab wo bahir aya to wo ghar say bahir qadam rakh rahi thi. “Mahnoor!” Uzair ki awaz sun kar wo ruki. “Mein bi tumharey sath chalu ga. Mil kar celebrate karein ge or ainda mein tum par kabi bi Pakistan ko chorney kay liye dabao nahi dalu ga Or na hi kabi mayoos houn ga.”

Mahnoor us ki bat sun kar muskra di khushi say uski ankhein bhar ain...

Umeed e Sehar