Islam, Ahlaq or HUM

Pichle sal khuda ne muj par khas karam kia or apne ghar bula liya. Muje jab pata chala kay mein umra karne ja rahi hu aur Rasool e Pak (S.W) kay dar par bhi hazri ho gi to youn mehsoos hua jese barsoo ki koi khaish puri ho gai ho. 5 saal pardes mein rehne kay bad Allah kay ghar hazri or apne des wapsi thi...!
Mein bht khush thi kay apne mulak kay logo se milu gi, khoob batein karu gi. Waha pohnch kar jab mene khana kaba ka tawaf kia to muje dunya bhool gai. Tawaf karte hue achanak kisi ne mere scarf ko zor se khencha mein heran reh gai, mur kar dekha to aik orat ne muj se kaha "yaha scarf nahi chadar lete hain." Mein heran thi waha mojud har orat ne abaya pehna tha or upar scarf ya chadar li hui thi.
Mene un ki bat par tawajo na di phir kuch hi dino bad jab aftar ka time hone ko tha oe Allah ka ghar mere samne tha or noor barsta dikhai de raha tha, sab log ibadat mein masroof the kay achanak 2 aurtein ik kursi kay liye larai karne lag gai or ik dusre ko qamayat kay din tak kay liye bad dua de di.
Wahi log zyada khana kharidate, thora sa khate or zyada phenk dete. Muje apne hotel kay bahir chawalo ko gire dekh kr Africa mein bhook se marte bache yad ate.
Pardes mein ik building mein rehte log aik dusre ko jante b na houn to "Hello" bolte hain. Rasool e Pak (S.W) ne to aurtoo tak ko salam karne ka huqam dia ha magar afsoos aj hum to ik dusre ko salam ka jawab tak nhi dete.
Madina munawara mein masjid e nabvi mein bethe aik pakistani aurat apne samne do aurto ko bitha kar kuch aqwal e zaree bata rahi thi or samne ik orat Riaz ul Jannah ki taraf jane kay liye pakistani group ko guide kar rhi thi aise mein un aurto kay pas bethi chand hawateen mein say ik ne us aurat se kaha kay abi us guide karne wali ko sun lo masjid mein beth kar bolte nahi or youn unho ne jawab mein kaha kay hum Islam ki hi batein kar rahe hain or wo guide karne wali mike mein cheekh cheekh kar khamosh hone ka keh rhi thi magar us ki koi sun nhi raha tha..!
Rasool Allah (S.W) ne farmaya kay "Tum mein se muj ko wo shaks bht pyara ha jis ka ahlaq acha ho."
Aj magrib mein ne hamare bht se andaz apna liye hain jese kay acha ahlaq jo hum ahista ahista kho rhe hain. Meri is tehrir ka maqsad kisi ki bhi dil azari karna nahi tha balke un chand bad tehzibio ka zikar karna tha jo hum log khuda kay ghar ja kar bhi nhi band karte.
Har aik ko ye jan lena chahie kay koi bhi is dunya mein PERFECT nahi hai. Har ik insan mein koi na koi khami zaroor hoti hai. Har kisi ko apna opinion dene ki azadi ha magar khuda ra apne rawayo ko durast bhi karna sikhye or tanqeed kisi pr ki b jae to moqa or jaga dekh kr krni chahie.
Is sab kay bad mein sawal karti hu kya hum wese muslman hain jesa hamein hona chahie?
Allah pak hum sab ko hidayat de (Ameen)
                                                                                                                    Ummed e Sehar