Garoor

“Sabeen! Meri zindagi bhi ajib hai. Har mor par imtahanat...” us nay thandi or safeed roi ki tarah naram baraf ka gola zameen par phenka.

“to Allah apne pyare bando se hi azmaeshein leta hai naa..!” Sabeen nay kursi par baithate hue kaha.

“mein konsa Allah ko pyara hu!”

“areay ap se kis nay kaha? Allah to apne bando say 70 mao se barh kar pyar krta hai" Sabeen nay kaha magr Saif nay us ki bat ka koi jawab na dia.

Sardio mein wadi e kohsar safeed chadar oray hue thi. Wo dono ghar kay barandey mein bethe hue the.

"lekin kya dunya ki sari azmaeshein mere liye hi hain? Mere dushmano nay mere bachpan kay dost ko muj se cheen lia..." uski awaz kanp gai.

"I know kay ap bohat udas hain magar zindagi mein log atey jate rehte hain. Itna waqat guzar gaya ap kay dost ko dunya chor kar gaye hue magar ap samnhal hi nahi pa rahe."

"log ate jate rehte hain....?" us ne sabeen ka jumla dohraya.

"han. Ab dekhein na ap ka aik dost gaya hai to apko itne ache naye naye dost mil gaye hain."

"lekin us jesa koi nahi mila..." wo ye kehne kay bad thori dair kay liye khamosh hua. Sabeen b chup thi.

"Sabeen...! tum to kabi nahi jao gi na?"

wo Saif ki bat sun kar muskrai. "jana to sab ko hota hai."

"par tumhein nahi....tum hamesha raho gi. Kahi nahi jao gi."

"kyu?" wo heran hui.

"kyu k tum meri biwi ho....aik ameer tareen business man ki biwi..."

"to kya ameer logo ki biwian hamesha zinda rehti hain? Unki biwio ko b to Allah nay banya hota hai. Wo b Allah ki hi mahlooq hoti hain. Jis nay jan dali hai usy wapis bi to deni hai."

"magar tumhari jan koi bhi nahi le sakta...koi b nahi"

"Garoor sirf Allah ki zaat kay liye hota hai Saif! Insan is kabil nahi kay garoor karey. Apko apni dolat par na jane kyu itna man hai yaha tak kay ap ko lagta hai kay ap ki dolat ki waja se hamein kabi is dunya ko nhi chorna pare ga. Mout aik haqeeqat hai or isy tasleem karna chahie." us ka lehja dheema tha. Sabeen ka ahlaq bht acha tha. Wo bat karti to yu lagta jese us k mu se phool jhar rahe hain. Isi waja se uska talah or karwe sach par b Saif ko gusa na ata.

"lekin muje khud par garoor hai. Mein nay jo b aj tak khuda se manga hai us ne muje khali hath hi lotaya hai. Muje jo mila hai apni mehnat ki waja se mila hai is mein khuda ki mehrbaniya kaha se aa gai?" lehja thora buland tha.

"khuda nay insan kay hath mein di hi sirf mehnat hai, kamyabi to us kay apne hath mein hai wo hi deta hai aur har insan ko jo mehnat karta hai phir jo garoor karta hai wo us ka garoor hak mein mila deta hai."

"Huh! Mera nahi mile ga aur......" is say pehle kay wo apni bat mukamal karta us kay mobile ki ringtone sunai di.

"kyaaa.....? ye kya bakwas kar rahe ho, mein abi ata hu..!" wo hawas bakhta ho gaya or mobile kan se hataya.

"kya hua?" Sabeen nay pocha.

"factory mein aag lag gai hai. Hamein foran Karachi jana ho ga." wo TV lounge mein dahal hone kay liye mura.

Sabeen bhi apni kursi say uthi. Wo TV lounge mein dahal hone hi wali thi kay aik urti hui goli us kay sar say takrai. Goli ki awaz sun kar Saif bagta hua bahir aya. Magar tab tak us kay dushmano nay Sabeen ka jisam goliyo say chalni kar dia hua tha.

"Sabeen.......!!!!!!!!!!!!!!!!!!!!!!" aik zor dar chikh us kay muu say nikli. Wo us kay pas zameen par betha or us ka sir apni goad mein rakha.

"khuda garoor karne walo ka garoor hak mein mila deta hai." ataktey ataktey Sabeen kay muu say ye hi alfaz niklay or inhi alfazo kay sath us nay hamesha kay liye apni ankehin mond li...

Umeed e Sehar

Wafa

Wo subah sab se pehle uthati thi or un k bad un ki chohti beti Zarqa jagti thi or baqi sab ghar walo ko jagana uski ki duty hoti thi. Aj bhi Tahira uthi to sab say pehle Zarqa ko jaga diya or wuzu karne chali gain. Un k jate hi sab se pehle Zarqa apni bari behan kay bed ke nazdik gai.

“Zoya api utho namaz parho. Fajar ki namaz ka time hai agr namaz nahi parho gi to ama gusa karein gi or agr unho nay gusa kar dia to tumhara din bura guzre ga or agr tumhara din bura guzra to tum muj pr gusa karo gi or jab tum muj pr.....”

“uff mere khudya...! kyu subah subah mere kaan khane aa jati ho. Jao yaha say...” us nay Zarqa ki bat katate hue kaha or apni bat khatm krte hi dobara sir bistar mein chupa lia.

"Agr mein chup ho gai to ama ki dant khao gi or ye jo tum subah subah har roz mera ehsan manane ki bajae k mein tumhein roz ama ki dant se bacha leti hu muj pr gusa krti ho ye koi achi bat nahi suna tum nay magr tum kyu suno gi tumhein meri batein kab se itni aham lagne lagi wese had hoti hai aik chohti si bachi tumhare samne kab se batein kr rhi hai or tum hil jul hi nahi rahi bht buri bat...wese Zoya..."

"Zarqa!" wo uth kr bethi. "tum kya kha leti ho subah subah, itna bolti ho, dimag kharab kr deti ho tum mera, din mein to aesi nhi hoti ye subah subah kya ho jata hai tumhein."

"Is bat ka jawab mein tumhein bad mein du gi pehle zara mein Sheraz bhai ko jaga au."

Is kay bad us ne apne bhai Sheraz ka darwaza itne zor zor se khatkataya kay wo jag gaya. Jab tak sab namaz ada karte or tayar ho jate un ki ami jan ne nashta tayar kar dia.Sab ne mil kr nashta kia. Sab se pehle Sheraz university kay liye nikla is k bad Zoya or Zarqa ghar se nikali Zarqa ka school qareeb hi tha wo apne school mein dahil hui or Zoya collage k liye chal pari. Wo chal rahi thi kay aik bike us k kareeb aa kr ruki, wo chonk gai magar jab us ne bike pr sawar larke ko pehchana to muskra di magr thori nervous b ho gai.

"Shameer! Tum bhi na itni taiz bike chalate ho or yaha kyu rok di koi kam hai?"

"Tumhare aba jan wapis aa gaye?" us ne jawab dene ki bajae sawal kar dia.

"Nahi. Kal aein gay."

"Ok. Betho aj ghoom phir lete hain."

"ji nahi muje collage jana hai." Zoya ne jawab diya.

"Areay agr aj itne dino bad tumhare aba hazoor shehar se bahir chale hi gaye hain or bhai sahab b yaqinan university pohcnch hi chuke houn ge to tum kyu moqa ganwa rahi ho. Chalo na ghoom phir lein ge."

Zoya nay Shameer ko chand mahine pehle apni aik dost ki shadi par dekha tha. Aik dost kay zariye hi un dono ka taruf ho gaya, jan pehchan hui to dosti b ho gai or ye dosti muhabat mein badal gai.

Unhein mile sirf 3 mahine hue the. Zoya us se phone par bat karti thi ya collage ate jate kabi kabar raste mein un dono ki mulaqat ho jati lekin wo kabi b Shameer k sath ghoomne nahi gai thi.

Aj jab wo usy ghoomne k liye jane ka keh raha tha to wo soch mein par gai. "Mein Shameer par kese ankhein band kar k yaqeen kar lu magar mein muhabat karti hu us say or wo bhi or muhabat mein shak ki kunjaish hi kaha hoti hai."

Akhir kar wo us k piche bike par beth gai. Kafi ghoomne phirne k bad wo aik resturant pr gaye is k bad Shameer nay Zoya ko Zarqa kay school kay samne chor diya. Zoya bohat khush thi. Zarqa ne usy itna khush dekha to heran hui.

"Zoya! Pehle is waqat tumhara mood itna kharab hota hai or aj dekho to sahi baglo se hansi nikal rahi hai."

"Han khush to mein hu...or bohat zyada khush hu is mein koi shaq nahi par kyu hu ye tumhein nahi batane wali..."

"ok na batao muje bhi koi shooq nahi janane ka!" Zarqa nay mu charhate hue kaha.

Sheraz apne muhale mein dahal hua to us ki bike kay samne us ka aik purana dost jis se us ne dosti tor di thi karha hua. Majboran usy bike rokni pari.

"Ye kya batmizi hai. "

"Sheraz! Tumhein saboot chahie tha na. Tumhari behan meri behno ki tarah hai mein us par ilzam lagane ka soch bi nahi sakta tha. Tumhein laga tha na k mein jhoota hu ye dekho ye

tasveer. Ye aaj ki hai or ye mein nay nahi banai balke resturant mein mere aik janane wale nay bana kar bheji hai. Mene usy bohat danta hai or foran delete karne ko kaha hai." Us nay apna mobile Sheraz kay samne kia. Sheraz kay hosh ur gaye. "tum b delete kar do." wo sirf itna hi keh saka.

Ab se taqriban aik mahina qabal Sheraz kay dost Ali nay Zoya or Shameer ko kai bar gali mein batein karte dekha tha magar us nay kabhi bhi Sheraz say zikar nahi kia tha phir jab muhale mein Sheraz kay aik or dost nay dekha to foran usy bataya or us waqt Ali bhi us k pas hi tha. Us larke kay jane kay bad jab Ali nay us ki bat ko sach kaha to Sheraz ko bohat gusa aya or us ne Ali say bat karna chor diya usy Zoya par andha aitbar tha wo kehta tha jab tak mein apni ankho se na dekh lu mein apni behan pr shaq nahi kar sakta us ne Ali say dosti tor di magar Zoya kay samne is bat ka zikar tak na kia magar aj us ki tasveer us k samnae thi jaha wo Shameer kay samne bethi thi.

Wo ghar aya to ate hi Zoya ka pocha. Wo us waqat apne kamre mein namaz parh rahi thi.

"Beta kheriat to hai?" us ki ami jan nay gabra kar pocha.

"G sab thik hai bas us se kam hai."

Wo Zoya kay room mein gaya. Usy namaz parhta dekh kar us ka gusa thora kam hua. Zoya nay namaz khatam ki to Sheraz karha hua.

"Zoya! Aj tum collage gai thi?" Lehja buland tha.

Usy apne kano par yaqeen nahi ho raha tha bilkul wese hi jese Sheraz ko Zoya ki tasveer dekh kar apni ankho par yaqeen nahi aya tha.

"Ji....ji bhai........mein to....collage hi thi." us nay atakte hue kaha.

"Jhoot mat bolo Zoya agr sachi ho to meri taraf dekh kar kaho k tum Shameer kay sath nahi thi."

Shameer ka nam sun kar us kay pairon tale zameen nikal gai. Us kay chehre par aik rang ata to aik rang jata. Usy samaj nahi aa raha tha kay wo kya kare jab kuch samaj na aya to us ne apni ankho par hath rakha or rona shiru kar diya.

"Betho yaha!" Sheraz nay bed ki taraf ishara karte hua kaha. Wo roti hui beth gai. Sheraz bhi us kay samne beth gaya. "Zoya! Meri behan! Tum muje bohat pyari ho or tumhari izat bhi. Tum itni giri pari nahi ho kay raste mein chalte hue kisi bhi larke se batein karo us k sath ghoomoo phiro ye harktein tum jesi larkiyo ko zaib nahi deti. Shameer ko mein achi tarah se janta hu wo agr tumhare qabil hota to mein khud tumhari shadi us se karwa deta magar Zoya beta wo is qabil b nahi kay tum jesi larki ki taraf ankh utha kar b dekh sakey."

"Bhai wo bohat acha hai. Mein usy achi tarah say janti hu wo bura nahi hai. " Us nay himat kar kay bola.

"Zoya! Tum usy kab se janti ho?"

"3 mahino say. Bhai mein us se muhabat karti hu or muhabat gunah to nahi."

"tum usy 3 mahino say or mein usy us k bachpan se dekh raha hu. Muhabat gunah nahi Zoya kyu k is par insan ka bas nahi chalta magr Zoya jo tum us k sath ghoomti phir rahi ho us se gali mein karhi ho kar batein kar rahi ye sawab b nahi."

"Lekin bhai...!"

"Khabardaar agr aj kay bad tum us se mili to mein pehli or akhri dafa keh raha hu or agr ab mein nay usy tumhare sath dekh lia to mein is tarah dobara nahi samjau ga yad rakhna." Wo bat ko lamba nahi karna chahta tha.

Zoya us ka room se bahir jate hi bed pr giri or rona shiru kar diya. Us kay dimag mein Shameer ki sari batein ane lagi wo kis tarah us say muhabat kay dawe karta hai kis tarah us se milne ki khaish karta hai jab wo us se bat nahi karti to usy kitna yad karta hai...Or Sheraz jo is waqat usy aik sakht ustad se barh kar kuch nahi lag raha tha.

Agley din un k aba wapis ae to dono betiyo kay liye toufe laye. Zarqa to bohat khush thi magr Zoya buji buji si thi.

"Zoya Beta! Sab khair to hai?"

"ji aba sab thik hai."

Kal raat say Shameer usy call kiye ja raha tha magr wo bat nahi sun rahi thi. Akhir kar us nay phone uthaya. Shameer ki awaz sunte hi us ne rona shiru kar diya.

"Zoya! Kya hua hai?" Wo pareshan hua.

"Shameer! Bhai ko tumhare bare mein pata chal gaya hai or unho nay tum se milne ya bat karne se sakhti se mana kar diya hai."

"Oh...to ye bat hai. Tumhari kya rae hai?"

Zoya nay phone rakh diya. Subah wo collage ja rahi thi to raste mein Shameer aya magar Zoya na ruki.

"Zoya!" us ne bike side pr karhi ki or bagta hua us k piche gaya. "Zoya! Bs itni hi tumhari muhabat...?"

"Nahi Shameer mein tum se bht muhabat karti hu magar ghar wale..."

"Manane ko to mere ghar wale bhi tumhari family ko pasand nahi karte or mein janta hu unhein razi karna asan nahi ho ga magar phir b Zoya mein nay haar to nahi man li." Wo aik lamhe k liye ruka. "Zoya tum muje se sach mein muhabat karti ho?"

"Han Shameer! Mein kuch b kar sakti hu tumhare liye."

"Zoya hum ye shehar chor dein gay. Mein aik hafte kay andar andar bando bast karta hu tum tayar rehna hum yaha se chale jaein gay, court marriage kar lein ge or pursakoon zindagi guzarein gay.!"

"Ye tum kya keh rahe ho...!" Zoya heran hui.

"Theek keh raha hu. Tum zehni tor par tayar rehna." Us nay mazid bat na ki or wapis apni bike ki taraf chala gaya.

Zoya k liye ye hafta bht ajib sa tha wo Zarqa kay sath b bat karti to usy lagta jese wo akhri bar bat kar rahi hai. Apna ghar dekhti to yu lagta jese ainda nahi dekh pae gi to us k dil mein yaha rehne ki khaish hoti. Apne maa baap ka pyar apne behn bhai ka pyar....us nay kabi itna mehsoos nahi kia tha jitna is hafte kar rahi thi. Raat ko Tahira us ka matha choom kar jati us k aba ate hi Zoya Zoya pukar uthate, Bhai sab kuch janane k bawajood usy koi tana na deta or Zarqa ki meethi meethi si batein ...! Aj sham ko Shameer nay usy phone kia or 12 baje ghar se nikalne ka keh diya. Us nay kaha kay wo us k ghar kay samne aik bacha bheje ga jis k sath wo aa jaye.

8 baj chuke the. In ghanto mein wo Shameer ki muhabat or apne ghar walo ki muhabat ko tarazu par rakhna chah rahi thi.

11 baje tak us nay apna faisla kar lia. Wo uthi aik paper or pencil pakra.

"Shameer! Ye bat sach hai kay mein tum se bohat muhabat karti hu or shyd hamesha karti rahu gi magar bat ye bhi jhoot nahi kay mein apne maa baap ka maan hu, mein apni behan ki parchai hu mein apne bhai ki laadli hu. Tumhari muhabat ki khatir mein itni sari muhabato par laat nahi mar sakti or na hi muhabat kay nam par apne ghar waloo ki izat ko rol sakti hu. Mein agr aj tumhari khatir apne ghar walo se bewfai kar jau to mein khud par yaqeen nahi kar saku gi. Jo larki khoon kay rishte se bewafai kare wo kisi or rishte se wafa kese kar sakti hai. Agr mein tumhari qismat mein likhi hui to tumhein mil jau gi nahi to tumhari raah alag or meri raah alag. Mein aj kay bad tum say kabi bat nahi karu gi or na hi milu gi zyada se zyada kya ho jaye ga maru gi nahi or agr tarap tarap kar mar bhi gayi to shaheed kehlau gi."

12 hone mein 5 min rehte the to us ne apne kamre ka darwaza khola. Usy bht dar lag raha tha wo dhire dhire apne ghar kay darwaze kay samne pohcnh gai. Us nay aram se darwaza khola to samne aik bacha karha tha us ne us k hath mein latter dia or darwaza band kar diya.

Jab wo apne kamrey mein pohcnchi to lambi lambi sansein lene lagi. Uski nazar Zarqa par pari jo pursakoon nind soi hui thi. "mein kabi nahi chahu gi kay kal ko meri behn ghar se bhag jaye ya aik bhagi hui larki ki behan kehlae." us ne socha.

Wo latter Shameer nay parha to usy bht gusa aya. Us nay parh kar phenk diya. Wo apni bike par betha or ghar ki taraf chala gaya...

                                                                                                   Umeed e sehar