Badalte rang

Wo aik brown rang kay lakri kay darwaze kay samne khari thi. Us kay hath mein aik halkey gulabi rang ka suitcase tha. Us nay apna chashma ankho say hataya or darwaza khola. Darwaza kholte hi aik khoobsurat bagicha tha. Aj wo phool jo us kay dada dadi nay bohat shoq say lagaye the murjaye hue the. Kuch dair to wo khari us ghar ko dekhti rahi. Wo yadoo kay in gehre samandar mein doob jana chahti thi magar us kay gaal par girne wale nanhe say ansoo nay usy bacha lia. Us nay apne galo par hath phera or suitcase dhakalte hue agey barhi.
Sara furniture safaid chadaro say dhaka hua tha yu jese sadiyo say yaha koi na reh raha ho. Wo ik kamre mein dahil hui. Har chiz par gard jami hui thi. "lgta ha sab say pehle safai karni ho gi." Us nay socha.
Wo bohat nafasat pasand thi. Fresh hone kay bad us ne ghr ki safai shiru kar di. Ghar mein majood har chiz ko wo saf karne kay liye pakrti to us ki taraf dekhti reh jati. Har ik chiz say hazaro yadein juri thi.

Achanak ghanti baji. "Shyed Umera aa gai..!" us kay siwa usy koi or rishta dar milne nahi aa skta tha.
us nay ja kar darwaza khola or khushi say Umera ka istaqbal kia magar Umera kuch khush dikhai na di. Jab us ne andar aa kar safai ka saman dekha to heran hui.
"Areay tum kyu safai kar rahi ho? Mein abi kisi mulazma ko bulati hu..."
"Nahi....muje apna kam khud karna acha lagta ha." Momina nay puraitmad lehje mein kaha. "Kya hua Umera?" us nay Umera ki ankho mein chuphe kai sawal parh liye.
"Tum meri help karo gi na?" Us kay chehre par bebasi ayaa thi.
                                                       ********************
"Momina...! Momina....!" Amara nay gari say nikal kar zor zor se pukarna shiru kar dia.
Kale rang ka court pehne or sir par hijab liye Germany kay ik shehar Trier kay ik khoobsurat ilaqe ki gali se nazrein jhukae tez tez chal rahi thi, us kay kandhe par aik bag bhi tha or hath mein chand kitabein bhi thi. Amara ki awaz sunte hi wo chonk gai. Us nay mur kar dekha to Amara ko sir phair kay inkar kr dia.
"Jaldi ao! agr piche koi gari aa gai to masla ho jae ga." Amara nay hath kay ishare say bulaya.
Wo apni jaga say hili bi nahi thi kay Amara bhagti hui us kay pas gayi, usy bazoo say pakra or gari ka darwaza khola. Piche say ik car b ati dikhai de rahi thi. Majburan usy gari mein bethna para. 
"lgta ha tumhari dost ko hamare sath bethna acha nahi laga...!" Usman nay tans kia.
"Areay nahi bhai ye to hai hi aesi......!" Amara nay Momina ki safai paish ki.
University pohnchte hi Momina Amara par baras pari. 
"To muj say nahi bardasht hota kay itni sardi mein meri itni payari friend is tarah say ae." Us nay safai paish ki.
"Kal meri gari ho jaye gi thik...! aik din say muje kuch nahi hone laga tha."
Wo apas mein behas kar hi rahi thi kay un ki Bangladesh ki dost Kajal bhi un k pas ai. Phir Maryam ka gusa b kam ho gya.
Momina ka aik iklota hi bhai tha jo apne father kay sath kamyabi say buisness kar raha tha. Zaron ki zindagi kay sare khawab pure ho chuke the ab bas apni bacpan ki mangetar Bisma se shadi karna baqi thi. Wo us ki mangetar hone kay sath sath us kay chacha ki b beti thi. 
Zaron nay apni behan Momina ki har khaish puri ki thi. Wo us ki aik bht achi dost bhi thi. 
Ab un kay waldain Pakistan jaa kar Zaron or Bisma ki shadi kar dena chahte the. Bisma kay maa baap b aik say zyada martaba shadi ka keh chuke the.
                                                      *********************
Raat ko wo akele hi khana bana rahi thi. Cooking karne ka usy bilkul shooq nahi tha lekin waqat nay usy boht kuch sikhane kay sath sath ye kam bhi sikha dia tha. Shiru shiru mein to wo cooking books parhte parhte pura din guzar deti. Ab wo bht acha khana bana leti thi.  Aj wo baryani bana rahi thi.
Pure ghar mein khushboo pheeli hui thi. Us nay sara kitchen samaita or apni plate le kar bahir gai.
"Aj to maza aa jaye ga...!" us nay sofe par para hua TV ka remote hath mein pkra or beth gai. khane kay sath sath news channel dekhna us ki purani addat thi.
Khane kay bad wo us nay TV band kar dia or ghar kay bagiche mein chehal qadmi karne lagi.
"Waqat kay sath sath zindagi kitni badalti jati ha. Kabi hamare irad girad logo ka hajoom hota hai mgr hum khud ko tanha mehsoos karte hain lekin kabi kabi hum tanha hote hue bhi apne pas boht se logo ko mehsoos krte hain." Us nay socha.

                                                       *********************
Momina ki ami Pakistan ja chuki thi or shadi ki tayari mein masroof thi. Wo har roz Pakistan mein sab say Rabta karti or Zaron to sirf Bisma say hi batein karta rehta.
Aj Amara nay us say aik aisa sawal poch lia kay usy jawab dena mushkil laga. 
"Pehle to Usman tumhare piche piche bhagta tha. Par jab say tum meri birthday part pr ai thi tab say us ne kabi muj se tumhein koi paigam dene ko nai kaha na tum say bat karta ha...Batao na kya kaha tha us nay tum say...?" Us nay tajasus say pocha.
"Kuch nahi kaha tha mene usy bs muje jo ami nay aj tak samjhaya ha wo usy samjane ki koshish ki thi." Us nay jawab dia.
"Oh to tum nay usy apni ami kay lectures sunae houn ge." Wo hansi. "Beta tumhari family mein to larkiyo ko college jane ki bhi ijazat nahi or tum....tum Germany ki University mein Wakalat parh rahi ho. Tumhein parhane ka faisla galat na sabit hone dena. Ye wooo..........hai na?" Amara nay apne hi andaz mein us ki ami ki kahi gai batein bol di.
"Tum kabi baaz nhi aa skti...!" Momina nay us book uthai or us kay kandhe par mari jis par wo khilkala kar hans pari.
"Wese pata ha Usman nay sayast mein dilchaspi leni shiru kar di ha...!" Us nay sanjidgi say kaha. Uski bat sun kar Momina hans pari. 
"Sach keh rhi hu.....jab say mene usy bataya kay Momina keh rhi thi kay wo ya to kisi army officer say shadi kare gi ya phir kisi advocate say or ya phr kisi sayasat dan say....Ab dekho parhai say to wo bhagta ha is liye sirf sayasat dan hi ban sakta ha or wo b asani say...!" Wo chehki.
"Tum meri kahi hui har bat Usman ko kyu bata deti ho." Us nay phir say gusa kia.
Amara ka taluq aik bht ameer or sayasi gharane say tha. Us kay chacha MNA the.
                                                  *********************
Rat dair tak jagne kay bad akhir usy nind aa hi gayi thi. Subah fajar ki azan shiru hote hi us ki aankh khul gai. Wo uthi or namaz aada ki. Namaz kay bad wo talawat e quran mein mashgool ho gai.
Usy achi tarah yad tha bachpan mein us ki dadi isi ghr mein unhein quran parhaya krti thi. Aj wo akeli waha thi or koi bhi na tha. Aj usy apno ki yad bht sata rahi thi.
Us nay Umera ko phone kar kay ghar bulaya. Wo to tayar bethr us kay phone ka hi intazar kar rahi thi.
Aj wo Momina kay ghar ai to wo nashta bana rahi thi.
"Tum akele kese reh rhi ho. Mene kaha na mein mulazma ka bando basat kar deti hu." Umera nay dohraya.
"Muje akele rehne ki adat hai." Us nay muskra kar jawab dia. "Tum jao betho mein tumhare liye b nashta le kar ati hu."
Nashte kay doran dono nay zyada bat na ki. Mgr nashta khtm hote hi Umera nay besabri say kaha.
"Muje us insan kay sath nahi rehna. Mein tang aa gai hu."
"Sab thik ho jaye ga. Mein Bashar say milna chahu gi." Us nay pursakoon lehje mein kaha.
"Thik hai wo kal hi idher aa jaye ga."
                                                         *********************
December kay end par christmas ki chuthio kay sath sath Momina kay Pakistan jane ki tayaria bhi mukamal ho chuki thi. Us nay sari family kay liye koi na koi chiz li. Filhal sirf wo apne baba kay sath Pakistan ja rhi thi. Zaron ko shadi say do din pehle ane ko kaha gya.
Usman ko us kay walid nay buisness kay silsale mein Berlin bheja hua tha. Jab usy Momina kay Pakistan jane ki khabar mili to us nay wapis ana chaha magr us kay papa nay saf mana kar dia. 
Pakistan jane say aik din pehle Amara nay usy phone kar kay bataya kay Usman wapis ana chah raha tha magr us nay us ki bat an suni kar di jis par Amara ko bht gusa aya. "Momina mera bhai pagalo wali muhabat karta ha tum say or tum ho kay us ka zikar karna bhi gawara nahi karti...!" Us nay phone rakh dia. Us ki theeki bat sun kar Momina kay ansu gir pare. Usman say muhabat ka beej us kay dil mein boya hua tha magar wo isy aik poda ya darakht nahi banana dena chah rhi thi. 
Wo ghar say nikalne hi wali thi magar abi tak Amara usy milne nahi ai thi or na hi us kay kisi message ka jawab de rhi thi. Amara ki narazgi usy bechain kar rhi thi kay achanak us kay kamre ka drwaza khula. "Tum bht bewafa ho par mein nahi...! meri ikloti dost ho phr na jane kab ao gi. Socha mil hi au pr narazgi apni jaga ha yad rkhna...!" Wo or Amara bagal geer hui.
Zaron unhein airport chor kar aya tha. 
                                                         *********************           
Bashar agle din ghar aa gya tha. Wo dono bagiche mein rakhi kursio par hi baithe the. Thori dair halki pulkhi gup shup kay bad Momina nay asal bat ki taraf ana chaha.
"To tum Umera say khush nahi ho?"
"Muje us say koi kisi kisam ka gila shikwa nahi hai. Wo na sahi magr mein to us say bht muhabat krta hu or usy talaq dene ka soch b nahi skta magar wo hai kay meri bat samjti hi nahi." Bashar nay wazahat ki.
"Magar us kay mutabiq to tum usy bat bat par dantate ho. Us par chilate ho or hath b utha lete ho."
"Aisa nahi.....mein gusa karta hu us par jab wo muj se badtamizi karti hai magar mene kabi us par hath nhi uthaya. Zyada safaiaa nahi paish karta bs itna dekh lijie kay agar us say rishta khtm krna hota to kabi bghi us ki aik call par ap kay pas na ata." Bashar nay safai paish ki.
Momina ko bhi ab surat e haal ka andaza hone laga.
                                                                    *********************
Pakistan mein wo bht khush thi.Ye uski zindagi kay haseen tareen pal the. Roz sham ko wo apne gaoo kay harey bharey kheto ki sair ko jati or rat ko ghar kay aangan mein aag jala kar hath saikne kay sath sath sahelio or chacha zad behno se gup shap ka maza hi kuch or tha.
Har koi us se Germany kay logo kay bare mein pochta. Un kay rehan sehan or khane piney par gaoo kay log maloomat lete or herangi kay sath sath un kay chehre par muskrahat b aa jati.
Udher Usman ko na jane kya ho gaya wo bar bar apne waldein say Momina say mangni ki zid karne    laga. Us kay ghar walo ko Momina bht pasand thi magar wo filhal rishte ki koi bat nhi karna chahte the. Us ki zid nay us kay walid ko majboor kar dia kay wo apne bhai say kahein kay wo Momina kay ghar us Usman ka rishta le kar jaein.
Wo aik aali shan gari mein apni begum kay sath Momina kay ghar gaye. Momina kay gaoo mein un ki aamid par herangi thi. Bisma kay maa baap bhi bht khush the magar jab unho nay rishte ki bat ki to baqi sab ki khushi to dugni ho gai magar Bisma kay waldain ko bat pasand na ai.
Momina nay Amara ko phone kar khushi ka izhar kia or aitraf kar lia kay wo Usman se muhabat krti ha. Wo bohat khushi thi magar us ki sari khushi mand par gai jab rat ko us kay chachi chacha ghar ae or us ka hath apne bete Muneer kay liye mang lia or sath mein saf saf keh dia kay agar ye rishta na hua to wo apni beti ka rishta bhi tor dein ge.
Sab bohat pareshan the. Momina ne ro ro kar apna bura hal kar lia tha. Zaron us kay kamre mein aya to wo khamosh ho gai. "Momina! tum nay aj tak muj say jo manga ha mene tumhein dia. Tum bht takleef mein ho magar tum say zyada takleef mein Bisma hai jis ka nam bachpan say muj se jura ha or tum to Usman ko janti bhi nahi. Apne bhai ki khushian tumhare hath mein hain. Mera man rakh lo. Muneer bht acha larka ha. Police officer hai or intahai iman dar or shareef lrkha hai. Inkar mat karna."
                                                               *********************
Aj Umera us kay pas bethi thi kay Bisma ki call aa gai. Umera kafi dair us say batein karti rahi. Bisma nay bhi usy ye hi samjane ki koshish ki kay wo Bashar kay sath zindagi guzare. Is puri guftago kay darmayan Momina ka zikar tak na hua.
"Momina! tum kisi say bat nahi karti?" Umera nay pocha.
"Agr koi ap kay wajood ko hi manhoos karar day de to us say bat karne ka kya faida...!" Us kay lehje mein puhtagi thi.
"Magar jo hua is mein tumhara to koi kasoor nahi tha."
"Kasoor kisi ka bhi nahi hota hum yu hi aik dusre ko ilzam dete rehte hain...!"
"Tum bohat bahadur ho....!" Umera nay kaha.
"Koi bahadur ya kamzor nahi hota. Ye waqat hi hai jo insan ko kabi to bht bahadur bana deta ha or kabi bht bebas or kamzor...!"
                                                                *********************
Uski shadi Muneer say ho gai or Bisma ki shadi Zaron say. Muneer bht acha larka tha wo us say bohat kam bat karta magar us ki bht izat krta tha. 
Momina bhi qismat ka likha jan kar sab kuch bhulane ki koshish kar rahi thi. Agr kabi Usman ka khial us kay dil mein ata to wo khud ko dant deti. 
Kuch arse bad Bisma or Zaron Germany chale gaye. Un kay janey kay kuch hi dinoo bad us kay ami abu bhi wapis chale gye. Us nay Muneer say Germany ja kar parhai ki bat ki magar us nay saf inkar kar dia. 
"Pata nahi ye shaks zindagi say kyu itna uktaya hua ha. Chalo is ki mehrbani, muj par gusa to kam az kam nahi karta...!" Us nay khud say mukhatab ho kar kaha.
Sasural mein ab us kay pas Umera hi hoti thi jis say batein krte us ka pura din guzarta. Apne saas susar ki wo puri khidmat karti thi. Us kay chacha to us say bht khush the magar chachi kabi kabi usy thiki thiki batein suna deti thi. 
Germany mein sab khair kheriat se the. Us ka sab se rabta tha magar Amara nay us se bat karna chor di hui thi. Un ki akhri dafa bat tab hui thi jab us ki awaz sun kar Amara nay us say waja pochi. Wo phoot phoot kar rone lagi or bata diya kay Muneer ka rishta aya ha. 
Wo apne ap ko khush rkhne ki koshish karti. Bacho ki tarah ji behlati magar Muneer ki khamoshi us kay dil mein bht say waswase paida kar rahi thi.
Aik raat Muneer ghar hi na aya. Pata chala kay wo aik operation par hain or khatarnak gang ko pakrne wale hain. Momina sari rat apne shohar ki salamati kay liye dua karti rhi magar subah ka suraj us kay liye koi acha paigam na laya.
Wo to aa hi gaya magar zinda halat mein nahi. Pure ilaqe mein kohram mach gaya jab us ki dead body gaoo mein lai gai. 
                                  
                                                     *********************
"Mein Ameen say muhabat karti hu or usi kay sath zindagi guzarna chahti hu. Bashar say shadi sirf aik samjota hai." Aj subah Umaira nay usy saf saf bata dia. "Tumhein mene is liye bulaya hai kay tum meri madad karo. Adalt mein case karo."
Momina us ki batoo par khamosh thi. "Tum kya samaj sako gi. Tum nay kon sa kabi kisi say muhabat ki ha. Bhai say shadi par bhi to tum khush nahi thi." Umaira na umeed si ho gai.
"Muhabat.......!" Momina nay dur kahi sochte hue kaha.
"Muje aj tak nahi pata chala kay jab ama aba nay tumhein bhai ki mout ki waja karar de kar ghar say nikal dia tha or tum wapis Germany chali gai thi, is kay bad tumhare sath kya hua tha?" Umaira nay socha. "Tum nay Bisma baji or apne ami abu say aledgi kyu kar li thi."
"Muje Umaira ko sab kuch batana hi ho ga. Kash ye samaj jaye kay muhabat bhi waqat kay sath sath badal jati hai." Us nay socha.
"Betho.....aram say bat karte hain." Wo bagiche mein rakhi maiz kursio par beth gain. Sham hone ko thi."Uncle aunti nay muje manhoos karar dia or ghar say nikal dia. Wo raat mere liye wo bohat aziyat da thi. Mein bewah ho chuki thi magar kisi ko khial na aya. Mein dadi kay ghar yaha hi aa gai thi jaha hum log jab bhi Pakistan aate qayam karte magar mein us raat bilkul akeli thi. Muje kisi nay mere marhoom shohar ka akhri didar bhi nahi karne dia tha." Uski ankhein bhar ai magar us nay apne ansu rok liye.
"Koi muje yaha bardasht nahi karna chahta  or sab ki berukhi meri bardasht se b bahir hoti ja rahi thi is liye mein idat kay bad Germany chali gai. Waha ja kar mere maa baap nay to muje sambhalne ki koshish ki magar Bisma ka rawaya mere sath bilkul bhi acha na tha. Wo bat bat par muj say larai karti thi. Us kay mutabiq bhi mein hi manhoos thi. Meri ami usy dantati to rat ko ik hangama khara ho jata. Bhai Bisma ko rote dekh kr sab se batmizi krne par utar aya tha. Phir......" Wo bolte bolte ruk gai.
"Phir kya hua?" Umaira nay tajasus say pocha.
"Phir aik din Amara mere ghar aai. Wo us waqat ai jab mera wajood sab par bhari tha. Wo meri bachpan ki dost thi muje is hal mein dekh kar mere galey say lag kar pooth pooth kar ro pari. Us ka bas nahi chal raha tha kay muje mere ghar say usi wqt le jaye. Usy sab kay rawaye ki khabar thi. Muj par guzarne wali qayamto kay bare mein sun kar us say raha nhi ja rha tha. Or mein.....mein to dhoond rahi thi koi aisa humdard jis kay kandhe par sir rakh kr mein ji bhar kay ro lu. Amara nay muje zindagi ki taraf lana shiru kia. Wo mujhe dhake say bahir ghumane lay jati. Muje shopping karwati. Mere bhikre hue tukro ko us nay samaitna shiru kar dia.
Phir aik din us nay mujhe bataya kay Usman nay abi tak shadi nahi ki. Jab say usy mere ane ka pata chala wo is kadar udas hua kay wapis Berlin chala gya. Usy muje dukhi dekhne ki himat bhi nahi thi. Amara nay muje bataya kay Usman bhi toot chuka hai or agr koi usy samait sakta hai to wo sirf mein hu. Us nay muje umeed dhilai kay ye ghar wale jo muje bhooj samjte hain ye bhi azad ho jaein gay."
Wo bat karte karte ruk gai.
"Usman wo hi na jis ka MNA Masnoor rishta le kar aya tha?" Umaira ne pocha.
"Haan. Wo hi tha."
"Phir tum nay us kay liye haan kar di thi?"
"Han......us din mein or Amara aik resturant mein bethi thi muje nahi maloom tha kay us nay Usman ko bulaya hai. Mene dil ko bht mushkil say us se shadi kay liye manaya tha. Mein nay Amara ko bata dia kay mein razi hu. Usman aa gya.........." Us ki awaz laraz gai.
"Usy Amara nay bataya kay mein us se shadi kay liye tayar hu magar.......us nay........us nay kaha kay us ki sari humdardia mere sath hain magar wo aik bewah say kabi shadi nahi kare ga.....!" Or kuch kehne ki himat na rahi us mein.....wo uthi or apne kamre mein chali gai.
Umaira ne bhi ab us say koi bat karna munasib na samji or wapis ghar chali gai. Momina nay sari raat rote guzari fajar say thori dair pehle us ki aankh lagi.
Subah us nay khud Umaira ko call kar kay bulaya. Pehle to is topic par koi bat na ki magar Umaira say ruka na gya. "Phir tum aledha ho gai thi?"
"Mera wajood sab par booj tha. Mene sab say umeedein laga li thi ye hi meri galti thi. Phir mene tamam insano ko chor kar rab se umeed lagai or Allah nay muje mayoos na kia. Aj mein ik kamyab wakeel hu. Muje Allah ki zaat kay siwa kisi ki madad ki zarorat nahi parti." Wo muskrai.
"Umera! dusri shadi ya pasand ki shadi koi buri bat nahi lekin meri ik baat yaad rkhna agr tum Ameen say shadi kar bhi lo gi na to kahi na kahi, kabi na kahi wo tumhein ye ehsas zaroor dilae ga kay tum nay us say dusri shadi ki hai. Bashar tum say bohat muhabat karta hai. Muhabat karne walo ko khona nahi chahie. Achi tarah say soch lo or kal muje muje apna faisla suna dena." Us nay pursakoon lehje say kaha.
Umaira kay waldain jan chuke the kay Momina Pakistan ai hui hai. Wo Umaira kay Bashar kay sath rawaye par bohat pareshan rehte the. Ab to unhein yaqeen tha kay Momina un dono ko aledha kar kay hi jae gi.
Agle din Umaira or Bashar dono sath ae or Momina ka dil say shukria ada kia. "Tum nay muje aik kamyab zindagi guzarne ka gur sikha dia ha. Rishto ki asliyat samja di hai." Uski khushi ka thikana nahi tha.
"Apka bohat shukria. Ap hi hain jo is pagal ki aqal ko thikane le ai hain." Bashar nay bhi shukria ada kia.
Momina bhi khush thi. Ab wo wapis Germany jane ki tayari mein thi. Us nay apna sara saman tayar kia or ghar say bahir nikali. Jab wo darwaza band kar kay nikal rahi thi to wo heran reh gai. Us kay chacha chahi us kay samane nadamat say sir jhukae khare the. "Hum logo nay tum say bohat zayadati ki hai. Tum yaha thi to ye hi samjte rahe jese tum hamari beti ko galat mashwra de kar us ka ghar turwa do gi magar tum nay to hamare itne bure kay bad bi tum nay hum say acha kia." Us ki chacha ki ankhein nam ho gai.
"Hamein maaf kar do beta...!" Us ki chachi nay hath jor kar us say mafi mangi. Us nay un kay hath pakar liye. "Maaf kia...!" Us nay ansoo bhari ankhein mein ankhein dal kar kaha or apna suitcase dhaklte hue agey barhi.
"Ye waqat insan say kya kya karwa leta ha.....kal mein in kay samane hath jor jor kar roti thi aj meri ankhein to khusk thi magr wo ankhein nam thi....aj mere hath nahi un kay hath bande the...!" Us nay socha. "Aj mein Germany ro ro kar nahi khush ho kar ja rahi hu." Wo muskrai.
                                                                                                                       Umeed e sehar

Hasb e haal

Mera Salam

saniha e peshawar

Aj phir mere watan ki fizao mein un mao ki chikho ki awazein hain jinho ne subah subah apne jigar gosho ko tayar kar kay un ka matha choom kay school bheja tha....
Un bacho ki ankho mein mustaqbil kay kitne sunare or haseen khawab houn gay. Kya un 148 bacho ka ye juram tha kay wo apne or apne maa baap kay dekhe hue khawabo ki tabeer ki koshish mein lage hue the? Kya ab mere watan mein dehsat gardo ne khawab dekhna b juram qarar de dia hai?
Un bacho ki takleef ka azala kon kare jinhein zindagi bhar kay liye mazoor kar diya gaya ha?
                                                HAI KOI MASIHA?
Kya hukmaran ko mutahid hone kay liye isi tarah kay hadsat ka intazar hota hai? Kya is dafa bhi 3 din ka sog mana kar in masoom bacho ko bhula diya jae ga? Aj har koi afsoos kay bayan de raha hai magar kal.........kal kisi ko yad b nahi ho ga?
Phr se ik taraf se jalso or dharno ka or dusri taraf se tanqeed ka silsala shiru ho jae ga. Magr is bat ka yaqeen kon dhilae kay ainda school jane wale bacho ko nishana nhi banaya jae ga..
Deshat gardi ka marz phelta ja raha hai is ki jarh tak pohnchna ho ga...
Aj hamare gulshan ki un kaliyo ko nishana banaya gaya ha jo khil kar hamare watan ka nam roshan karti.
Akhir mein bas ye hi keh skti hu kay Pakistan ka sab se bara masla deshat gardi hai. Khuda ra isy hal kiya jaye or isy hal karne kay liye sirf fouj ya hakoomat ki nahi balke Pakistani awam kay himat, hosle or tawan ki zarorat hai.
Khuda un tamam bacho kay ahbab ko sabar de...! Un sab bacho ko puri Pakistani qoum ki taraf se SALAM...!
                                         Meri maa mere loutne ka intazar ab na karna
                                         Aj se tera laal Rab ka mehman ban gya.......
                                                                                                                 Umeed e sehar

Islam zinda hota hai har Karbala kay bad

Kal Pakistan mein 8th Muharram tha or itwar ka din tha. Senkroo bacho nay, khawateen nay, buzargoo ne apne apne ghr waloo se kahi ghoomne phirne ki khaish ka izhar kia ho ga. Kuch log chirya ghar gaye houn ge kuch Badshahi masjid koi apni biwi bacho  kay sath Minar-e-Pakistan gaye houn ge or kuch to aese bhi houn ge jo apne watan se muhabat ka jazba liye apne biwi bacho or bazurgoo samet wagah border chale gaye houn ge.
Waha ja kar parade dekhi ho gi, watan se muhbt ka izhar karte khoob garam joshi say "Pakistan Zindabad" kay narey lagae houn ge.
Jab takreeb khatm hui ho gi to sab apne apne payaro kay sath apne apne gharo ko lotne wale houn ge. Karachi say ae un chand dosto nay in yad gar lamhoo ki tasweerein li houn gi, Samnudri se aye badqismat khandan ki masoom nanhi nanhi bachia takreeb kay ehtmam pr apne maa bap ki ungli pakre or apni cousins se batein karte apne gharo ko chal pari houn gi kay achank un nanhi nanhi masoom bachio ko ik dam ik awaz ne un kay sare khawab un ki sari khushian miti mein mila di or unhein un kay maa baap se juda kar dia, wo Karachi se aye dost bichar gaye.....wo Lahore mein basne wale aik hi family kay 6 afrad apni jan ki bazi har gaye, Dera Ismail khan se ai Dr. Shumaila apni bachio or husband kay sath is dunya ko hamesha kay liye chor gai. 60 afrad is waqe mein luqma-e-ajal ban gaye.
Apne apno ki lashein dhondne ko mare mare phir rahe the. Lahore kay bashinde Wagah Border pr pohnche or logo ko mukhtalif haspataloo mein muntaqil karne lage. Khoon ka atya manga gaya to sara Lahore uth kar haspataloo mein jama ho gya....
Pakistani qoum ka jazba deshat gardoo kay muu par tamacha tha kay aj subah jab takreeb honi thi to pura Lahore Wagah border par jama ho gaya or pehle se bhi zyada garam joshi se nare lagae or dehshat gardoo ko ye bataya kay hum un ki in harkatoo se darne wale nahi hain wo kya chahte the kay aj kay bad wagah border par koi na jae............? Hamari qoum nay bhi aj unhein bata dia kay "Islam zinda hota hai har Karbala kay bad....!".
                                                                                                                        Saba Anwer

Muharram

Islami sal ka pehla mahina Muharam hota hai. Is mahine ko islam mein bht zyada ahmiat di gai hai. Hazrat Abu Huraira (R.A) bayan karte hain kay Rasool e Pak (S.W) ne farmaya: "Ramzan kay bad sab se afzal roze Allah kay mahine muharram kay hain or faraz namaz kay bad sab se afzal namaz e tahajud hai".
Ye wo mahina ha jis ka nam sunte hi ankhein nam ho jati hain or dil Hazrat Hussain (R.A) ki azeem qurabni ko yad karne lagta hai. Hazrat Imam Hussain (R.A) se hamare pyare Rasool (S.W) ko bht muhabat thi. Ap (S.W) ne apne dono nawasoo kay liye farmaya "Hamare ye dono bete jo anane jannat kay sardar hain, Inka dost hamara dost, in ka dushman hamara dushman hai."
Hazrat Imam Hussain (R.A) ko isi mahine ki 10 tarikh ko shahdat naseeb hui thi. Ap to wo hasti hain jinho ne ishq ki ineha kr di or apne ishq ki kahani karbala ki rait pr likh di jo qamayat tak nahi mit sakti. Isi liye Muhammad ali Jauhar nay kya khoob kaha tha:
                                        Qatl-E Hussain Asl Men Marg-E Yazid Hai
                                         Islam Zinda Hota Hai Har Karbala Ke Baad
Islam ko zinda karne wali is azeem hasti ki jurat pr rashak ata hai magar wahi ye bat soch kr bht takleef hoti hai k aj hum firqo mein batey hue hain or har koi aik dusre ko kafar qarar dene pr tula hua hai. Kisi kay pas koi haq nahi kay wo kisi kalma go ko kafir karar de.
Har aik insan ka apna apna aqeeda or apni apni soch hoti hai ye zaroori to nahi kay har koi kisi dusre ki soch se aitfaq kare. Hamein aik dusre ki soch ki izat karni chahie or kisi kay aqeede ko bura nahi kehna chahie or azadi e rae par yaqeen rkhna chahie.
                                                                                                                         Saba Anwer

Madine ka Safar

                                                   Madine ka safar

Us din mujey maca mukarma se nikalna tha or madina munawra kay liye rawana hona tha. Sehri kay bad hum nay Haram Pak mein namaz e fajar ada ki or Khana kaba ka tawaf kia. Logon ko girgrate or rotey dekh kr mujey andaza ho raha tha kay Allah pak nay in mein se kisi ko b khali nahi bhejna, insan to aik bande ko dete hue b soch mein par jata hai . Ye bat b mene waha sikh li or apni ankho se dekh lia kay khuda ko ibadat ki zarorat nahi wo insan ko hai, ibadat kay liye to farishtey b hain is k ilawa Allah kay ghar har waqt Allah ki ibadat hoti rehti hai.

Wo juma ka din tha. 7^th chakar mein meri nazar khana kaba se hut hi nahi rahi thi ye dua hi laboo pr thi kay ya Allah mujey bar bar apne ghar bulana. Akhri dafa khana kaba pr nazar pari to ansu gir pare the.

Hotel mein pohnch kar madina rawana hone ki tayari ki phir zohar ki namaz prhte hi haram pak se madine ki janab chal pare.

Jese jese gari chalti ja rhi thi, madina dekhne ki khaish b barhti ja rhi thi.

                         Madine ka safar hai or mein namdeeda namdeeda

                        Jabeen afsurda afsurda qadam lagzeeda lagzeeda

Ye ashar mere laboo par ate to ansu girne lag jate. Aftar ka time ho gaya. Hum logo nay aik masjid kay samne aftari ki. Abi thora sa time hi reh gaya tha.

Hum madina enter ho gaye, hotel mein pohnche. Sone ko ji hi nahi chah raha tha bs ye hi dil tha k jaldi se masjid e nabvi mein jaein.

Phir hum masjid e nabvi ki taraf chal pare, bht thandi thandi hawa chal rahi thi or rat ka waqat tha. Wo gunbad mere samne tha. Ankho par yaqeen nahi aa raha tha. Yu lag raha tha jese koi khawab ho....!

Wo din bht ache the, madina ja kar pata chala kay zindagi or khushi kya hoti hai. Har insan ka jazba dekh kar bht khushi hoti thi. Aqa kay dar se koi khali nahi jata tha. Mein dil hi dil mein bht si nateein prh rhi thi muje yaqeen tha mein jin kay liye parh rhi hu wo zaroor sun rahe hain.

                     Basaarat kho gayee lekin baseerat tau salaamat hai
                     Madinah hum ne dekha hai magar nadeedah nadeedah

                                                                                                                         Saba Anwar

Pakizagi

Us  ka nam Madiha tha, wo bht sidhi sadhi or bhooli bhali si lrki thi. Is wqt wo 9th class mein prhti thi us k walid sahab america mein hote the, wo Pakistan mein apni dadi, chachu, chachia or ami kay sath raha karti thi. Us ki zindagi mein koi bara dukh nahi aya tha.

Madiha raat ko sone se pehle apne dil ki sari batein apne rab se share kar kay soti thi. Aj raat isha ki namaz k bad wo dadi or ami ko shab e khair keh kar apne kamrey mein gai. Us ne darwaza band kia or apne bed pr ja kay beth gai. "Allah ji...!" us ne dua kay liye hath uthae or ankhein band kr li. "Aj mein bht khush hu, kyu kay ami bata rahi thi kay ab thore dino mein hum abu ji kay pas chale jaein ge." Madiha nay ankhein kholi or khushi sanjidgi mein badal gai. "Par dado or antii to hamare sath nahi ja rahi na, or meri sari saheliyaa....? mein kese rahu gi in sab kay bagair.....Muje to adat bi nahi mgr ami kehti hain kay nai nai dostein mil jaein gi pr in jesi to koi nahi ho gi na magar ap kay pyare pyare bande to har jaga hote hain...haina? Ab muje zyada si wali nind aa gai hai, subah fajar ki namaz kay liye muje jag aa jaye plz...Ameen" Us ne hath muu pr phere or muskrate hue so gai.

Kafi din guzrne kay bad un ka visa aa gaya or un logo nay America janey ki tayari shiru kar di. Madiha khush b bht thi magar apno se dur hone ka dukh bht tha.

 Tayaria mukamal ho gai un kay jane ka waqt b nazdeek aa gaya. Us ki dadi nay usy aik bat samjai.

"Madiha! mulak change kar rahi ho zehan change na karna...!"

Wo America pohnchi to sab bht acha magr naya naya lag raha tha. 

"Papa ap ka America to bara acha hai....Isi liye ap Pakistan nahi atee?" Us gari mein bethe idher udher dekhte hue kaha.

"Haha! Nahi Madiha, mein yaha kam karta hu na is liye. Agr Pakistan aa jau to kam kon samhale?"

"Han ye b hai...!"

Wo ghar pohnchi to apna ghar dekh kar bht khush hui. "Areay wao Papa ap akele itne bare se ghar mein rehte hain?"

"Ab akele kaha hain...?" Us ki mama nay kaha.

"O haaN....! ab to hum b reh rahe hain na papa kay sath." Us ne khushi se kaha.

Kuch din ghoomne phirne kay bad us ka school mein dahla lene ka time aa gaya. Us kay papa nay ache se school mein us ka admition karwa diya. Us ka school mein dil nahi lagta tha, usy english ki samaj ati thi  wo likh b bht acha leti thi magr usy bolne mein masla banta tha upar say un kay lehje mein to bilkul b nahi....
Wo jab urdu ya punjabi kay lehje mein english bolti to sab se zyada pakistani larkiya hi us par hanstii. Aj class mein khamoshi thi or teacher parha rahi thi. Class kay doran Madiha kuch ka chehra yu tha jese usy kuch samaj nahi aa rhi ho.
"Madiha! are you ok?" Us ki teacher nay pocha mgr us nay koi jawab na dia. Us ki khamoshi pr us kay aas pass bethe sab students hasne lagey. Us ki teacher ko pata chal gaya kay Madiha ko problem ho rahi hai or pakistani larkiya hi us pr zyada hansti hain to unho nay usy aik masoom se sadey say aik pakistani larke Ali k pas bitha diya.
Wo dono ik dusre se koi bat nahi karte the. Han magr jab us pr koi hasne lagta to Ali usy dant deta. Madiha kafi pursakoon mehsoos krti thi.
Ali nay jab dekha kay Madiha break mein b akeli khari hai to wo us k pas gaya. "hi..!" us nay muskrate hue kaha. Madiha nay b muskra dia.
"Akele kyu khari ho?"
"Friends hi nahi hain abi...!" us nay jawab dia.
"Hmm! Pakistan mein kaha say ho? Gao say ya shehar say?"
"Gao say par aj kal to gaoo b bare modern ho gaye hue hain." Wo hansi. Ali ko b uski bat par hansi aa gai. Ali aik mazhbi girane say taluq rkhta tha. Madiha ki ami bht zyada mazhbi thi magr abu itne nahi.
Ahista ahista Ali or Madiha roz hi break mein ikhate ho jate. Ab Madiha bhi jijak kay bina Ali say batein karti thi. "Tum nay kabi Allah say batein ki hain?" Ali nay us say pocha.
"Han...roz karti hu."
"Wao....bht achi bat hai!"
Un ki dosti din ba din barhti ja rhi thi. 10th kay akhri din tha chuthio say pehle. Ali nay Madiha ko kuch batana tha magr wo aai hi nahi thi. Wo bht udas tha usy nahi pata tha kay Madiha kaha rehti hai or na hi wo cell phone use karti thi or na hi koi social website.
Chutian ho gai thi. Madiha ko b fikar ho rahi thi Ali ki magar koi ata pata nahi tha.
Ali nay bht koshish ki Madiha ko dhondne ki magar wo usy nahi mil rahi thi. Us kay pas time b bht kam tha. Wo log Australia ja rahe the.
Time khtm ho gaya Ali chala gaya...
Chuthia guzarne kay bad Madiha nay jab dekha kay Ali nahi aa raha tha to us nay Ali ka intazar kia. Jab wo nahi aya to usy majboran apni class ki larkiyo se pochna para.
"Ali kaha hai?" Us nay Nazia say pocha.
"Pata nahi...! Tumhara dost tha tumhein pata hona chaie muj se kya pochti ho..." Us nay do tok jawab dia.
"Suno abi break hai...hamare sath hi aa jao..! kya akeli phirti raho gi."
Wo kuch soche samje bina Nazia kay sath chal pari. Nazia usy apni baqi friends kay pas lay gai. Un ki kuch batein Madiha ko bht achi lagi or kuch bht buri.
"Akele rehne se to behtr hai in kay sath reh lu....itni b buri nahi hain...!" us nay socha.
Ab wo roz unhi kay sath rehne lagi thi. Sab say us ki kafi dosti ho gai.
Aj Abeera collage se jaldi chali gai. Madiha nay Maha or Nazia say Abeera ka pocha.
"Wo apne boyfriend kay sath gai hai." Maha nay bataya.
"Us kay ghar walo ko pata hai?"
"Na b ho to kya hai."
"Farq to prta hai na yar...!"
"Acha choro is sunday ko Nazia ka Birthday hai tum aa rhi ho...Ok...?"
"Ami say pochu gi.."
"Bs tum aa rahi ho koi nhi pochna wochna....!" Nazia nay hukam dia.
Sunday ko wo Nazia kay ghar gai. Us kay sab friends moujud the. Aj Madiha nay sr pr lene ki bajae gale mein dubata dala hua tha. Us kay khubsurat or lambe bal dekh kar us ki sari dostein heran thi.
"Madiha....! Tumhare bal to kitne pyare hain yar collage bi khool kar aya karo plz." Abeera nay us se kaha.
Wahi us ki mulaqat Nazia kay aik friend Moiz say hui. Un logo nay kafi dair batein ki.
Agle din wo hijab kay bina collage gai. Uski dostein bht khush hui. Kuch dino bad Moiz collage kay samne aya. Wo sari friends collage se bahir niklii to samne Moiz ko dekh kr us kay pas gai.
Kafi dair bato kay bad sab nay saturday ko ghoomne ka plane bana lia. Madiha b razi thi.
Saturday ko wo sab ghoomne phirne gaye. Mgr Madiha zyada Moiz kay sath hi rahi us kay bad to aksar Moiz or Madiha collage time bhi ghoomne chale jate.
Moiz nay Madiha say keh rakha tha kay wo us say bht zyada muhabat karne laga hai or us kay liye bht sanjida hai magr ye sab kuch us din jhoot sabit ho gaya jab Madiha nay Facebook account bana lia or Moiz ki har dusri larki kay sath pics dekh li. Us say agle din Moiz collage kay samne aya.
"Muje tumhari asliyat pata chal gai hai. Tum nay muje samaj kya rakha hai. Mein un lrkiyo mein say nahi hu jin kay sath tum ne pics banai hui hain." Us ne buland lehje mein kaha.
"To khud ko tum bht acha samjti ho....agr itni hi achi ho to har roz apna collage chor kr ghar bataye bina mere sath kyu ghoomne jati ho. Meri asliyat muje dikhane se pehle apne andar dekho." Aik pal mein itni muhabat ki batein karne wala Moiz usy thukra gaya tha.
Ye us kay liye koi itni bari bat nahi rahi thi jab usy us kay grup kay ik larke Haroon nay sahara diya. Isi doran un kay collage mein ik new pakistani lrki ai jis ka nam Iqra tha. Wo kafi time say America mein reh rahi thi magar un kay collage mein nahi prhti thi.
Iqra ko Madiha kay pas jaga mili thi. Iqra us kay pas aa kr bethi.
"Hi.......!" Madiha nay rasman keh dia.
"Asslam o Alikum" Iqra nay dheeme se lehje mein salam kia.
"Walikum salam" Madiha nay b keh dia.
Iqra khamoshi say apna kam karti rehti thi. Madiha ki tarah break mein akele rehti thi. Iqra ki tarf dekh kar Madiha ko apna mazi yaad ata tha jab wo aik masoom or sada si larki thi. Haroon kay sath bethe hue b wo bas Iqra ki taraf hi dekhti rehti thi. Iqra sab say batein krti thi magar phir b akeli rehti thi.
Aik din wo Haroon ki bajae Iqra kay pas gai. "kya mein ap kay sath beth sakti hu?"
"Han g... zaroor...!" Us ne apni kitabein uthai or Madiha ko jaga di.
"Ap ko yaha kitna time ho gaya hai?"
"7 sal ho gaye hain...!"
"ap change nhi hui?" Na chahte hue b Madiha nay Iqra say poch lia.
"Jinhein change hona hota hai wo ho jate hain jinhein nahi hona hota wo nahi hote..! Or badal to hum kahi b reh kr skte hain yaha ho ya Pakistan ya kahi bi...Mahool asar dalta hai magar insan apna mahool khud banata hai Madiha."
"Ap bht achi hain...!"
"Tum b bht achi ho." Iqra nay muskra kar kaha.
"Mein achi thi, hu nahi....mein bht buri ho chuki hu bht zyada....pata hai Iqra mein Allah say batein krti thi ab wo b nhi krti. Jab tak mein Nazia logo say nahi mili thi bht achi thi magr ab to pata nahi kya ho gaya hai...!" Iqra kay poche bina hi Madiha usy bata rahi thi.
Haroon nay jab dekha kay Madiha usy wqt nhi de rhi to us nay ik or lrki say dosti kar li. Madiha nay usy dekha to dukh nhi hua kyu kay wo samaj chuki thi jo muhabat kay nam pr Haroon or Moiz nay us kay sath wqt pass kia tha.
Aj Iqra ghr pohnchi to samne ik lrka betha tha. "Asslam o alikum Ali bhai...!" Iqra nay salam kia.
"Walikum salam. Kesi ho behna? "
Ali or Iqra ki mama bachpan ki sahelia thi or un dono mein behno jesa pyar tha.
Ali Australia say wapis aa gaya tha. Wo Madiha ko aj tak nahi bhool paya tha. Aj wo collage kay samne gaya tha. Madiha ka hulya dekh kr wo heran reh gaya. Us mein itni himat bi na hui kay us se bat kr sake. Thori dair bad usi collage se Iqra nikli.
"Areay Ali bhai...! Ap yaha kya kar rahe hain?"
"kuch nahi...!" Us ne udas ho kar kaha. "Chalo chalte hain ghar...!"
Nazia un kay kareeb say guzri. "Hi Iqra...!" us nay ajeeb si nazro se dekhte hue kaha.
Iqra ne hath hila dia.
Raste mein Ali ruka. "Kya hua bhai?"
"Bat karni hai...!" Us nay sanjidgi say kaha.
"Ji bhai bolein...!"
"Tumhare collage mein ik lrki prhti hai na (Madiha)?"
"Han g"
"I love her....! kafi saloo say....Iqra wo aesi nhi thi. Bht achi thi wo pr abi pata nahi kya ho gya hai usy, Mere yaha kay frnds muje batate the kay wo change ho gai hai to mein yaqeen nahi krta tha magar aj usy ankho say dekh kr bht zyada afsoos ho raha hai....plz usy pehle jesa bana do...!"
"Hmm mein to sirf koshish kr skti hu, Hadayt to Allah deta hai or koshish mein zaroor karu gi...!"
"Thnaks sister...!" Ali ko khushi hui.
Agle din Iqra collage pohnchi to Madiha say us kay samne ai. "Mere samne to bari naik or shareef banti ho tum....or wese mere ik purane dost kay sath ja rhi thi...! Tum jesi larkiya andar se kuch or hoti ho or bahir se kuch or....change nhi hona change nhi hona aesi ho tum........?" Wo aag bagola thi.
"Bht bol lia tum nay. Janti ho Ali kon hai.....? Bhai hai wo mera or wo hi ik lrka hai jo tumhein sachi muhabat krta hai or pakeza muhabat....flirt nahi krta magr tum kya samjo tumhari to zehniyat itni gandi ho chuki hai k tum se koi bat karna hi fazool hai." Iqra nay apna lehja buland kar lia ta kay us ki batoo ka asar ho sake usy.
Madiha rote hue ghr gai or kamre mein ja kr zor zor se rona shiru kar dia. "Ya Allah! Muje wapis usi raah pr le aa jis raah pr mein pursakoon thi....Mere Rab aj mein itni mudat bad tuj se bat kr rhi hu...tuj se kuch mang rhi hu meri dua sun le...!" Wo ro ro kar apne Allah say faryad kar rahi thi.
Subah ja kar us nay Iqra say maafi mangi. Iqra nay muskra kar usy gale say laga lia.
"Tum bht achi ho magar ache dostoo ki sohabat nahi mili...! koi masla nahi dair aye darusat aye...!"
Iqra nay wapis ane mein us ki bht help ki. Wqt guzarne kay sath sath wo bilkul masoom si pyari si Madiha ban gai.
Ali nay apne ghar waloo ko Madiha kay ghar bheja, us kay papa love marriage kay sakht khilaf the lekin us ki mama nay jab Madiha ko dekha to foran han kr di or Ali kay papa ko b mana lia. Dono ka Nikah ho gaya tha mgr Madiha agey prhna chahti is liye ruksti us ki prhai khtm hone kay bad rkh li gai.
Ab wo Ali kay sath aksar ghoomne jati. Aise Insan kay sath jo us ka apna Husband tha or jo us say sachi muhabat krta tha or us ki dil say izat krta tha na kay aise insano kay sath jo us se muhabat nahi balke us kay ehsasat ko thes pohnchate the or na hi usy apne parents ko dhoka dena parta tha....!
                                                                                                                                         Umeed e Sehar

Zakhm

                                                     Zakhm
Zakhm do tarah kay hote hain. Jismani zakhm or rohani zakhm....
Jismani zakhm to waqt markham ki tarah bhar deta hai magar rohani zakham boht gahrey hote hain jo insan ko andar say kokhla kar dete hain. Us kay zameer ko mar dete hain.
Jismani zakhmo ka ilaj karne wale har jaga mojud hote hain magar rohani zakhmo ka ilaj karne wale masiha dhondne se milte hain.
Kabi kabi kisi ki zuban say nikle hue chand lafz itna gehra zakhm dete hain jo dusro ko to nazar nahi ata magar jis ko laga hota wo hi us ka dard mehsoos kar sakta hai. Isi liye hamein har bat karne se pehle aik bar zaroor sochna chahie kay hamari zuban say nikle hue alfaz kisi ko bht dukh ya bht khushi de sakte hain or zuban say nikle hue lafz wapis b nahi ho sakte.
Zindagi mein kabi na kabi to choot zaroor lagti hai aik chohta bacha jo naya naya chalna sikhta hai gir gir kay  qadam barhata hai himat to nahi harta na..! Or waqt kay sath sath chalna sikh leta hai. Har kam ka aik waqt hota hai kuch chizein hamein bht pehle chahie hoti hain un ki khaish aksar hamein dukh deti hai, rulati hai magar agr Khuda nay wo hamare naseeb mein likhi hui houn to hamein zaroor mil jati hain.
Waqt zakhmo ka sab se bara marham hota hai....ZaKhM bHaR jAtE hAiN mAgAr KuCh WqT lGtA hAi Or Un KaY bHaEnE Ka PeRiOd bht takleef da time hota hai magar himat or hosle wale insan usy guzar hi lete hain...! kyu kay unhein pata hota hai kay wqt hamesha aik jesa nahi rehta...!
                                                               Umeed e Sehar

        Zindagi aur khushian

Zindagi utar charhao ka nam hai. Zindagi kay graph mein kabhi khushian ati hain to kabi gam or jab hamare graph ki line bilkul sidhi ho jati hai to zindagi hi khtm ho jati hai.

Har insan ko zindagi mein khushi or gam zaroor milta hai ye kehna be mani hai k kisi ko kabi koi khushi nahi mili ya fala ko kabi koi gam nahi mila. Har insan ki khushia aik jesi nahi hoti. Aik gareeb admi din bhar mazdoori krne k bad raat ko apne bacho k sath beth kr khana kha le to khud ko khush naseeb samjta hai aur ameer logo ko to pata hi nahi hota kay usy kis chiz pr khush hona hai. Gareeb ki talash mein shamil sari khushian ameer apne sarhane taley dabae hota hai pr phir b usy us sakoo ki nind nahi ati jo aik gareeb ko din bhar ki mehnat kay siley kay bad hoti hai.
                                                                           Umeed e sehar

Aik Khaish

Mein tanha nahi...!!!